E lei talia gofie e faifeau le faaiuga o suesuega o le lipoti a le Ofisa o Sulufaiga lea na faatautaia i sauaga i totonu o aiga.
O le lipoti lea, o loo atagia ai le lē lava o galuega a faifeau o faia, e fesoasoani ai i le tafiesea o sauaga i totonu o aiga.
O le vaiaso na tea nei, na faatautaia ai mo le taimi muamua, le mafutaga a faifeau ma le sui o le Ofisa o Sulufaiga, o sui o Malo Aufaatasi, sui o Ekalesia i le atunuu, e iloiloina le tauaofaiga o le lipoti e pei ona fai agai iai suesuega ma faalauiloa talu ai nei.
O se tasi lea o vaega na agai iai le iloiloga, o galuega faatino a faifeau.
E lei talia gofie
Saunoa se tasi o faifeau o le Ekalesia Faapotopotoga Kerisiano i Samoa, EFKS o le Aai o Niue, Susuga Efu Efu e na te lē taliaina le vaega o le lipoti lea o loo ta’ua ai faifeau.
“I disagree over this, the church does not promote any violence within families, silasila foi, o le lona lua o faaiuga e pei ona aumaia i le lipoti, e leai se mea o ta’ua ai, o le isi mafuaaga o sauaga mai i fafo e mafua ona o le influence mai fafo.”
Na faaalia foi e le faifeau malolo Metotisi, Susuga Vaiao Eteuati, e tatau i le vaega lea na faatautaia le polokalame poo le suesuega ona faatu atu pe faailoa atu, poo ā la ni auala e ao ona fai, ae lē o le mātau leaga.
“Aua tatou te mātau leaga, ae faatu mai, faailoa mai o ā auala o outou silafia e fofo ai le faafitauli, tatou saili fofo, ae lē o le mātau leaga.” O le vaega foi lava lea e tasi na agai iai le saunoaga a le faifeau EFKS mai Matautu, Susuga Moli Moli.
“O a’u ou te lē fiafia i le faamamafa o le polokalame lea, o le sauaga mo tina ma tamaitai, e lē o sa’o, ma e lē o atoatoa i totonu o le context faasamoa.
E foliga mai o lea tatou te taumafai e faatalanoa le faafitauli ae lē o aafia ai ē, poo i latou na mafua ai le faafitauli, poo i latou o loo faatinoina le faafitauli.”
O le lipoti o Sauaga i totonu o Aiga e pei ona faatinoina ai le suesuega a le Ofisa o Sulufaiga, o loo atagia ai le leai o se galuega a faifeau i le faafitauli.
E lē gata i lea o loo manino mai i le suesuega e ala ia latou faatalanoaga na fai, o le tele o meafai i le lotu e ala ai ona vevesi aiga ma tutupu ai loa ma sauaga.
Na auai sui o ekalesia eseese i le atunuu, e oo lava i a’oa’o ma o latou faletua mai i Kolisi Faafaifeau i Piula ma Malua.
O le talitonuga o le faifeau Peace Chapel, Samoa Unoi, o sauaga o se mataupu e leai sona mutaaga se’i vagana ua toe foi tagata Samoa i le upu a le Tusi Paia.
“The reality is, violence will never end, it will never end, and I prophesize that, it will because we are living in a fallen world, it is the fallen nature of man, that commits an unlawful act, pau a na, tatou o i le Atua, pau a na o le vaifofo.”
O le finagalo faaali a le Failautusi o Ekalesia Soofaatasi, Maauga Motu, i le mataupu, o le tofu le nuu ma se komiti faapitoa poo se welfare committee, auā afai ae fai le tulaga lea, latou te lē mananao e ta’uvalea le nuu i se mea.
“O le galuega tonu lena a le komiti lea, latou te vaaia le physical and spiritual side o tagata o le nuu.”
Na lagolagoina e le faifeau EFKS Efu Efu le finagalo faaalia, o le toe foi lava i le Tusi Paia o le fofo sili foi lea.
“Ou te talitonu e lē mafai e se poto poo se atamai faaneionapo ona foia faafitauli faapea.”
“Pau a le fofo o le upu o le tusi.” Na mae’a le faatalanoaga mai i le aotelega o finagalo a le aufaigaluega e lē lava le lua itula lea na faatalanoa ai le mataupu.
