O loo matuā atoatoa le talitonuga a le Minisita o le Soifua Maloloina, o le a tele le suiga o le a oo iai le auaunaga a le Matagaluega pe a ioo ina tuufaatasia le Matagaluega o le Soifua Maloloina ma le Auaunaga a le Soifua Maloloina. O le vaiaso nei lea ua fuafua le Minisita e toe silasila tasi ai lava le komiti galue a le Matagaluega i le tuufaatasia o auaunaga e lua i lalo o le faamalu e tasi ona tuuina atu loa lea i le Kapeneta.

Saunoa Tuitama, e toe lava o le tuufaatasia o Tulafono e lua na limata’ita’iina ai auaunaga e lua i lalo o le Tulafono e tasi ona mae’a loa lea. “O lea na feiloai le matou komiti galue i le mataupu, ma o loo tau faamae’a, ona tuufaatasi ona aumai loa lea e matou te toe fono. A leai ni suiga, ona final loa lea ma ave loa i le Kapeneta, a mae’a ona silasila iai le Kapeneta ona ave loa lea i le Palemene, ma pasia loa.” “O lea e fuafua e tatau ona ave i le Palemene i le fonotaga a le Palemene i le masina fou, ma a pasia loa, e tatau ona toe foi le Matagaluega i le tasi pei ona sa iai muamua.” O le toe tuufaatasia o le Matagaluega o le Soifua Maloloina, ona ua matauina e le Kapeneta, le tele o sini autu faataatitia a le Matagaluega i ana auaunaga eseese e lei mafai ona ausia.

O nisi o auaunaga na matauina o le lē mafai lea ona galulue faatasi le Matagaluega ma le Auaunaga o le Soifua Maloloina, ma ua oo lava i le Komiti Faatonu o le Soifua Maloloina, ua lē usitaia ma faatino nisi o galuega faatonu e pasia e le Komiti. O nisi o auaunaga na matuā manino lea ma iloa, i le suesuega a le Komisi Faapitoa na faatonuina e le Kapeneta e latou te suesueina poo gafea tonu lea e lape ai le auaunaga a le Matagaluega o le Soifua Maloloina ina ua alia’e le faalavelave lea na maliliu ai pepe e toalua mai i le Maota Gasegase i Safotu i le masina o Iulai ina ua mae’a ona faatino o la tuipuipui i le tausaga, o le faama’i o le Misela, Mami ma le Lupela – MMR1.

O le vala na matauina i le suesuega, o le leai o se fesootaiga i le va o auaunaga e lua. E lē iloa e le Matagaluega fuafuaga o loo fai e le Auaunaga, ma e faatoa faate’ia sui o le Matagaluega o le Soifua Maloloina i se auaunaga o loo faatino e le auaunaga e aunoa ma lo latou iloaina, e ui o le Matagaluega e tatau ona pasia uma mataupu e ao ona faatino.

Ma na manino foi le saunoaga a le Taitaifono a le Komisi, le lē lelei o lea faiga ua matauina, aemaise ua aafia ai ola poo soifua o le fanau.

Na faaalia e le Minisita, Tuitama Dr Talalelei Tuitama, o le a matuā leai se vaega faapea e faaono toe tulai mai pe a toe tasi le matagaluega. O i latou o le a tele ona aafia o latou tulaga i le toe tuufaatasiga o le tulaga sinia. Ua faamauina foi e le komiti galue le tele o atugaluga mai i le aufaigaluega i le tuu eseesega lea o loo iai, ma o loo fai ma taiala i le gaioiga o loo taumafai nei. O le toe tuufaatasiga foi lea o loo popo’e iai le Asosi o Tausi Soifua, lea na o latou finauina ai le aveesea o latou mai i luga o le tusi ata poo le chart o le tuufaatasia o le Matagaluega.

E lagona tausi soifua, e tatau pea ona iloa lo latou ituvai i luga o le tusi ata, aemaise o le latou matafaioi i le ata a le Matagaluega.

Saunoa le Minisita, o itu uma na o loo silasila iai le Komiti galue, ma e lē na’o Tausi Soifua ua faaleo o latou fanoga, o loo faapea i itutino uma o le Matagaluega.