O le autalavou laiti ina ua maea le faamoemoe sa feagai ma latou

O le faatāuaina o le faasinomaga, e ala i le sailia o lou gafa ma lou tupuaga o le autu lea o le polokalame a le autalavou a le Uarota a Penrose 2nd a le Ekalesia Iesu Keriso o le Aupaia o Aso e Gata ai, na faataunuuina i le Aso Faraile 20 Setema.

O le polokalame sa faapitoa lea i le autalavou laiti, mai le 14 tausaga i le 18 tausaga le matutua, peitai, sa faapea foi ona lagolago iai le autalavou matutua 18 tausaga agai i luga. O se faamoemoe na lagolagoina e ta’ita’i o le Uarota le susuga i le Epikopo ia Tony Feagaiga faapea ona Fesoasoani, le susuga ia Brother Paneta Tauvao ma le susuga ia Brother Kaisa Tuigamala, ae o mātua ma aiga uma o le Urota a Penrose 2nd sa ofaga potopoto e lagolagoina le faamoemoe. 

Na amata i le ava o le feiloaiga, na faatinoina lava e le tupulaga talavou, ona faasolo ai lea o le latou polokalame. O lauga faafeiloai, o sulatoga, o le solo ava o le valaauina mātua poo le aofia foi ua mae’a saunia le taumafataga, o nisi ia o vaega o le aganuu sa faatinoina e le fanau talavou.

E fou i taliga le faalogo atu o tautatala ma talanoa mai le fanau i alagaupu faa-Samoa. O le isi lea tāua o faamoemoe faapenei, e faamasani ai fanau e tautatala i le upu ole gagana faa matai. O le isi tāua mo le fanau lava ia, o le faa masani lea e tautatala i luma o tagata.

Sa faapea foi ona o latou tapenaina faafiafiaga o le po e ala i siva ma pese faa Samoa. O le vaega lea o le polokalame na fesoasoani iai le autalavou matutua, o faafiafiaga. Na pati ma po le aumaimoa a’o alo le fanau ia latou faafiafiaga. 

E lei fesiligia foi le agaga mitamita o mātua i le vaavaai atu ia latou fanau, o tautatala mai ma militino i le faatinoina o tu ma agaifanua a Samoa. O le tele o fanau e soifua ma ola a’e i Niu Sila nei, e faigata ona maua avanoa e aoao ai ma faamasani i tu ma agaifanua a Samoa. Peitai o polokalame faapenei e mafai ai ona maua avanoa mo latou e a’oa’o ai le aganuu.

O le tama matua o le Uarota, le tofa ia Fiu Telea, sa fai ma sui o le susuga i le Epikopo ma mātua e faafetaia le faamoemoe o le autalavou. 

“E toatele tama ma tina ua ifo lava i le tuuagamau, latou te lei sulaina se toga, pe tufa se ‘ava ae amuia outou o lea ua mafai ona outou faatino nei vaega tāua o le aganuu.” O se vaega lea o le saunoaga faafetai a Fiu ma ia toe lu’i ai le autalavou ma ona ta’ita’i, ina ia aua ne’i muta ai, ae ia toe fai ma faaauau pea nei polokalame lelei ma le tāua i le lumanai. Na ia momoli foi le faafetai i taitai o le Autalavou, Sister & Brother Kanongata’a faapea le Faufautua o le autalavou, le susuga ia Paneta Tauvao aemaise le fofoga o le po le susuga ia Sialasa Kiso.

E pei ona ta’ua o se tasi o itu sa sili ona faatāuaina ilea faamoemoe, o le anauina, ma le faatāuaina o le sailia o lou tupuaga, e ala i le talafaasolopito o aiga (Family History), o se vaega tāua o le soifuaga le faamaumau o ou gafa ma ou tupuaga ina ia e manino ma iloa lelei lou faasinomaga. Na faaiuina le faamoemoe i le taumafataga na saunia lava e le autalavou, ona tatala ai lea o le filialii ma tuuama le fua.