O le filifilia o le APTC o se filifiliga tonu lea

Na faatumulia le maota o le Ekalesia Metotisi i le nanamu matagofie o faasolo ma le lagona o le fiafia o mātua faapea fanau ma aiga ina ua a’e manuia le faiva o alii ma tamaitai sa taumafai i a’oa’oga a le Kolisi o matata eseese a Ausetalia ma le Pasefika le APTC.

E 40 alii ma tamaitai na faauuina ma maua tusipasi o aoaoga tau inisinia, o le palama, o mataupu tau turisi, o fesoasoani tau galuega faafaiaoga, o mataupu tau faletalimalo ma le tomai i le kukaina o meaai, o le tomai faainisinia i galuega faakonekarate i le itu o uamea ma paipa tetele faapea ai ma le fai ea malulu. 

E ono masina na faatautaia ai a’oa’oga nei, ma o tusipasi foi ua maua e i latou e mafai ai ona saili galuega ai i totonu o Samoa poo le agai foi i atunuu i fafo e pei o Ausetalia. 

O le lauga a le alii faifeau le susuga ia Pastor Morgan Gegera, o ia foi o se tagata sa a’oa’oina ai i le APTC i le tausaga e 2015,  na ia failoa ai, “O le olaga e atagia ai lau faiga filifiliga, ma o filifiliga uma foi e faia e te lelei ai,  ae e te leaga ai foi. 

O nisi foi o taimi o se filifiliga laititi lava o le a avea lea ma tulaga e suia ai lou olaga e faavavau. O le filifiliga a le Atua na ia manatu ai e aumai lona atalii, e sui ai oe ma a’u. Na ia filifili e foai o le filifiliga a lona atalii na ia malie ai ma usitai e foai lona ola mo i tatou. O lou olaga e atagia ai au filifiliga…”

“O lau amio e atagia ai lau filifiliga, o lou fiafia e atagia ai lau filifiliga, o lou faamoemoe ma lou mautinoa e atagia ai lau filifiliga, o lou alofa e atagia ai lau filifiliga, o lou limafoai e atagia ai lau filifiliga, o lou ava ma faaaloalo e atagia ai lau filifiliga, o lou paiēee, o lou pepelo e atagia ai lau filifiliga, o au galuega lelei poo au galuega leaga e atagia ai filifiliga ua e faia i lou olaga. O ā lava filifiliga e te faia e atagia mai lea i lou tagata, o le mea lea i le aso nei ou te tatalo atu, Ia Filifili ma le Tonu.”

O le Minisita o Aoga Taaloga ma Aganuu ia Loau Keneti Sio le lauga na aami auā se faafetai ma se faamanuiaga mo le aufaauu aemaise le amanaia o le sao tāua o le atunuu o loo gapatia i le faatautaiga o lenei aoga e lē gata i Samoa nei ae o isi atunuu o le Pasefika.

E 22 mai le 40 o le aufaauu o tamaitai ma na ta’ua e le alii minisita lona fiafia tele ina ua ia maua lea tala e lē gata i le tele o mafuaaga ae o le tulaga sili o le faaoloaina o tamaitai i le tulaga tau tamaoaiga e ala i a’oa’oga o se tulaga lelei tele lea mo le tali tetee atu i le faafitauli o sauaga i aiga. 

E tusa ai ma faamaumauga a le APTC ua silia i le 1,700 alo ma fanau a Samoa ua a’oa’oina i le APTC talu ona faavae i totonu o le atunuu, ma o le 40 pasene o lena numera o tamaitai.

Na saunoa foi le alii minisita i le tāua o faailoaga ma tusipasi mai le aoga lenei ona o le amanaia i atunuu i fafo. E lei nanaina foi le tulaga na ala ai ona faavae i Samoa nei lenei aoga, e ui sa lei malilie i ai taitai o le Pasefika ma o latou talosagaina ai le malo o Ausetalia ina ia faia se isi polokalame ae taatia le aoga lenei ma lona faatuina.

O le vaitau tonu lena i le tausaga 2005 na faatulai mai ai foi le polokalame a le malo o Niu Sila i galuega faavaitaimi e le tamaitai Palemia o Helen Clark, ma mananao loa i ai taitai o le Pasefika a’o faia le fono a taitai o le Pasefika i lea vaitaimi, sa faapea loa foi ona talosaga atu ia Ausetalia e fai se polokalame faapei o Niu SIla, ae taatia le aoga lenei.

Sa teena uma e taitai o le Pasefika le aoga lenei se’i vagana ai le Palemia o Samoa lea na ia tulai ma faapea atu, “E talia e Samoa le polokalame a Niu Sila mo galuega faavaitaimi e faapena foi ona talia ma le aoga lenei o le APTC.” I le tofa a le alii Palemia Susuga Tuilaepa Sailele Malielegaoi na ia faapea atu ai, o se sao tāua lenei o Ausetalia mo le Pasefika ma ona tagatanuu o le a mafai ona ofoina mai ai a’oa’oga e maua ai tusipasi e agavaa ai mo galuega ma faaoloatauina ai i faailoga tau tusipasi faavaomalo.

Sa mou i lea taimi le ma’ema’e o taitai o le Pasefika ae na matuā faafiafiaina ai le Palemia o Ausetalia ina ua talia e Samoa lana ofo. E lei iai se tulaga na faapona’ia ai le tatalaina o lenei aoga i Samoa, ae o le taimi tonu foi lea o loo manumalo le itu a le alii o loo tulai mai nei i le tofi Palemia o Fiti ma lana vaega’au, ma o iina tonu foi sa faaletonu ai ma mafaufau o le malo o Ausetalia i le faatu ai o lenei aoga i Fiti, peitai i Samoa nei sa tatala lava faitotoa o lea aoga i le Iunivesite  i Le Papaigalagala i Vaivase  ia Aokuso o le 2007, ma amatalia ai i le na o le tolu i le fa mataupu.

O le faafetai a le malo ma tagatānuu o Samoa e le tuuina ifo lea e pei ona saunoa le alii minisita i le malo o Ausetalia ona o lenei avanoa tāua ua o tatou maua, ua mafai ai ona faaoloatauina alo ma fanau o le atunuu, ma o le faanaunauga ia faatumauina pea lenei tulaga tāua i lo tatou atunuu.

O nisi na faamanuiaina e aofia ai i latou o loo faigaluega pea ae ua maua le avanoa e faalautele ai le iloa ma le tomai i matata eseese o loo a’oa’oina i lenei aoga. Ua iai foi le faamoemoe o nisi o le a lē gata ai i lenei tusipasi le taumafaiga ae o le a saili avanoa pea ina ia mafai ona ausia le tulaga maualuga o tusipasi auā ni galuega e galulue ai i le lumanai.