E tu manu ae lē tu logologo, o le tele foi o popo e sua ai se lolo… E lelei tupe o maua mai i kamupani a le Day Care, ae iai nai itu ua lē tausisia e nisi, o lea sa afua ai se fonotaga na auai mai ai sui a le Matagaluega a le Human Services/Centre Link, faatasi ai ma sui mai le ofisa o Lafoga (ATO) ma nisi.
O lea fonotaga sa usuia i le itu i Saute o Brisbane i le taeao o le Aso Toonai, 8 o Novema. O le auga o aute o lenei fonotaga ina ia faamalamalama atili ni vaega e ao pea ona mataala ma nofouta i ai le au fai Day Care aemaise lava o le tupe o lafoga.
O se tasi lenei o pisinisi ua tele ina mafuli atu i ai le toatele o tagata ma ua tuu ai lava galuega a isi ona o le lelei tele o le tupe maua, ma ua iai sina faasiliga seleni i nai o tagata Samoa. O loo faamanatu pea ina ia mataala ma usitaia tulafono ma aiaiga ona e fai sina tetele o seleni e totogi ai sala pe toe totogi foi pe a oo ina afaina.
Ua manino le mata o le vai ma ua faafiafiaina nisi sa auai i le Aso Toonai ua tuanai. Momoli foi le agaga faafetai i le tofa ia Faimalotoa Ioane Pale ma le latou kamupani a le Access lea sa taulamua i le logo puialiiina o Samoa e auai atu i lea fonotaga e aofia ai ma nisi mai isi atunuu. O le lava o le malamalama ma manino se mataupu, o le solosolo lelei foi lea ma oo atu i se taunuuga lelei. E iai nisi o lagona ma manatu na faalēano i ni itu e ao ona silafia ae avea lea ma ala e fano ai, ae manatua, e sili lava le puipuia nai lo le tau togafitia.
Ua na o se faamanatu ae pule lava Sitafunē i le la o lona vaa.
