‘E lē o tupe Mea Uma, matou te fia taaalo lava mo Samoa auā e ese lava lea faalogona nai lo isi au ma kalapu.’ O se saunoaga lea a le kapeteni o le Toa Samoa ia David Faalogo i le fono a le autusitala na faia i le mae‘a o le taaloga ma Ausetalia.
Na mafua lea fesili a le Samoa Times talu ai tusitusiga ua faalauaitele ai le eseesega o tupe e maua e tama taaalo a Egelani, Niu Sila ma Ausetalia lea e i le va o le $10,000-$11,000 o latou alauni i le taaloga e tasi e faatusatusa i le $1,000 a nai alo ma fanau o le atunuu.
“E lē mafai e upu ona faatusalia le lagona o matou nei i taimi e laei ai le togiga a le Toa, o le itu foi lea ua lagona e tupulaga laiti le tāua o lou faasinomaga. Talosia foi ia tele nisi taaloga e faaolaola ai le lagona lotonuu o tama o le au faapea tagata tapuai matagofie o si tatou atunuu,”…David Faalogo.
I le taimi o toleniga mai le fā vaiaso ua tea e lei avea lea eseesega o tamaoaiga ma pa puipui i le sii o aao o le fanau e fia tautua mo Samoa. I le usuina o le vii o le saolotoga na vaaia le lotonuu o le Toa Samoa faapea le matautia o le lagolago a tagata na lolofi atu e maimoa.
O le taimi foi lea na toe oso ai le malosi o le Kangaroo ma sosoo a latou sikoa e tolu i le luasefulu minute amata ma faigata ai mo Samoa. E ui i lea na maua sikoa a Tim Simona, Ben Roberts ma David Faalogo. E ui i lea na manumalo le Kangaroos 44-18 e sailia ai ma Niu Sila le siamupini.
Na faailoa foi e le faiaoga ia Matt Parish le agaga faagaeetia mo lana au. “E lagona le mitamita i taumafaiga a alo ma fanau a Samoa i lo latou tausinio na iai mo le taimi muamua i le fā pito i luga ma e ui ua lē tau lau o le faamoemoe ae o se vaaiga lelei ua vaai atu i ai mo le lumanai.”
O le taimi nei ua atagia foi le manao o Niu Sau Uelese ia Tim Lafai faapea BJ Leilua ma o le tupe foi laa faaaliali e tauanau ai. O le uigi iloga ia Daniel Vidot ua iloga i lana taalo ma le taimi na ia teena ai le valaaulia e taalo ai ia Kuiniselani faapea le tele o ni faamanuiaga tautupe. Ua iloga ai le lototasi o tama e ofo lo latou tautua mo Samoa i taimi o taaloga faavaomalo faapenei.
Na uma le taaloga ona valaaulia ai lea o le Toa Samoa faapea le afioga ia Fata Brian Kaio le Hai Komesina o Samoa faapea le Konesula Fonoti Manogiamanu ma lona faletua i se taumafataga na saunia e le Fono Aoao i Sini, ma tauaao ai foi se meaalofa faatauvaa auā le au e pele i loto ma agaga o le atunuu le TOA SAMOA.
