Ua toe o se aga tatou aulia le Kerisimasi, ua uma le faitau masina a o lea ua faitau vaiaso, ae o se tulaga manaia ua amata faatino e nisi o kamupani tetele i le aai o Melepone, o le amata faatino lea o fiafia faaiu o le tausaga a matagaluega eseese.
E fetaui lava le oo atu i le vaiaso o le Kerimasi ma le mae‘a foi o le kamupani atoa, o se tulaga talafeagai i falefaigaluega tetele, aemaise i latou ua leva ona tapena e malaga i atunuu mamao mo faiga malologa, o le mafuaaga foi lea na silasila mamao ai se tasi o tina Fiti o loo pulea se tasi vaega tele o le faletalimalo o le Holiday Inn i le Malaevaalele faavaomalo i Melepone, ma faataunuuina ai la latou fiafia mo le Kerisimasi i le afiafi o le Aso Sa na mavae atu. Na autasi so latou finagalo ma nisi o faletua ma tamaitai Samoa o loo galulue ai, ina ia faia o se afiafi o fiafiaga ma teuga faa-Pasefika (Island Nite) na laei mai lava le tagata ia i teuga a lona atunuu moni, ae na faaula i ula Samoa ma Fiti, o taumafa na matele lava i taumafa Samoa, aemaise foi o le teuina o le malu.
Na amataina le faamoemoe i upu apoapoai mai le Tusi Paia ma le tatalo na saunia e le faafeagaiga Samoa, sosoo ma le taumafataga na numera tasi ai le pa‘umu a o faasolo pesega faa-Samoa ma le Pasefika, ae faaiu i faafiafiaga, o le tasi lenei tulaga tāua ma le matagofie ua maitauina i le aai, o le mitamita o o tatou tagata ia tatou agaifanua, ma fiafia e faalauiloa i faamoemoe tetele.
