O le Aso Lua muamua o le masina o Novema i tausaga taitasi o se tasi o aso pito tāua i le aai o Melepone ma le setete o Vitoria aemaise o le atunuu atoa o Ausetalia, faapea foi le mamalu e fiafia i tuuga solofanua i le lalolagi atoa, ona o le aso lea o le Ipu a Melepone i lea foi faagatama.
O le tuuga ma le Ipu pito i tele lea i Ausetalia, a o se tasi o tuuga pito i faatāuaina i le lalolagi, talu ai ona o le aso tele ma o le aso malolo foi mo le setete o Vitoria. Ua tele lava ina avea ma malologa umi mo aoga ma galuega i lea vaiaso, ma ua fuafua mamao foi i ai faamoemoe o le lautele i lea aso malolo.
O le ala lea na finagalo ai le Fono Faufautua mo tagata Samoa i Vitoria e faataunuu la latou taamilosaga lakapi taitoa fitu i le Aso Lua lea o le vaiaso talu ai ma avea o le aso e faapitoa mo aiga e tafafao faatasi ai.
Na molimauina le faatumulia o le malae lakapi a le pitonuu o Box Hill i le mamalu lasilasi o le atunuu mai tupu ma tamalii e oo lava i fanauiti, tainane le Aufaigaluega totofi a le Atua na afifio atu e lagolagoina ma tapuaia le taamilosaga ma tafafao faatasi i le lagilelei o lea aso.
E sefulu au na faaulu e aofia ai ma au e tolu mai o tatou uso tuaoi i Fiti. E tele faleaiga mo le fofoga taumafa, tele foi nisi o faalapotopotoga, kamupani ma Ekalesia sa faailoa ai a latou anavatau ma misiona, ae o le kamupani na lagolagoina autu (main sponsor) le faamoemoe o le Fono, o le Funded Learning o loo galue ai se tasi o le komiti o taaloga a le Fono, le susuga ia Willie Tanuvasa.
O le viiga sili na faafoi i le Atua ona sa maitauina le faamalieina o le silasila maimoa ma le tapuaiga a le paia o le atunuu, aemaise o le mamalu lautele na ofaga potopoto i se tautua vaivai a le Fono aemaise o le tausaafia o le taaalo o au uma sa tausinio.
O upu a le atunuu, “E ui ina tau lapalapa tama ae o le uso.” Faafetai ai i faiaoga, kapeteni ma pulega o au taitasi i la tou lagolagosua. O le siamupini o le Ipu ma le faailoga tupe e fā afe tala na manumalo ai le au a uso mai Fiti le Ovalau, tu lua le au malosi a le Faiouvae na mauaina le faailoga tupe e lua afe tala, tulaga tolu na tutusa ai le Western Sharks ma le Melbourne Fiji, sa mauaina faailoga tupe tai fitu selau tala.
O le ipu mafolafola na manumalo ai le Island Breeze i le la taaloga ma le Hume AOG Boys, ma le ipu faaofuofu na manumalo ai le Rosa Paepae i le la taaloga ma le Tepatasi. Na tofu au uma e sefulu na tausinio ma faailoga tupe na maua, ma le faailoga o le tama taalo o le taamilosaga, na maua e le alii o Tovio Tavae o le au a le Faiouvae.
E momoli le faafetai tele a le Fono i le mamalu o Samoa na lagolagoina le faamoemoe, faamanuia le Atua i lo outou tautiga.
