“Ua toe pagatia foi pitonuu i Sasa‘e o Kalaiesetete i mafui‘e”
O le faalua ai lea ona faataunuuina lenei polokalame fesoasoani e pei ona galulue faatasi ai uso palagi o le Rutland Street Church ma le aulotu Au Uso Kerisiano i Aranui, lea o loo taitaia e le susuga i le faifeau Faafetai Vaoga.
Na faatumulia le malae ogatotonu o tagata Pasefika i Hampshire i le Aso Toonai, 11 Iuni i le lolofi atu o tagata atumotu ma soo se tasi lava, o mātua ma fanau e fu‘e le pusa lavalava a le aiga faapea le tu i le laina o taumafa mo le sanuisi ma lau ipu papakiu ua taumasuasua.
O le auga o le faamoemoe ina ia fesoasoani mo aiga puapuagatia i le mafui‘e e iai Aranui, Brighton, Linwood ma pitonuu uma i Sasa‘e, lea ua ofoina fua lavalava ma taumafa.
E pei ona saunoa le susuga i le faifeau Faafetai Vaoga, o le molimau atu lea o le faaolataga ma le galulue fetausiai o le komiuniti.
Faapefea ona amata ma totogo a‘e le faamoemoe?
O le alii faipisinisi o Mark Broughton mai le Rutland Street Church na ia ofoina ma faatupeina nei fesoasoani ina ua ia fesootai atu i le faifeau o le aulotu Au Uso Kerisiano i le mae‘a ai o le mafui‘e ia Fepuari.
O lea ua galulue fai paaga ai aulotu nei e lua, faaalia e le faifeau o lea ua tatala mai faitotoa o manuia e pei ona talosia i talosaga.
O le aulotu Au Uso Kerisiano aemaise nai tina lalelei sa feagai ma le gaseseina o le papakiu faapea le salamiina o sanuisi ae taitai komiti ai Fiu Sefo le alii fai fagogo.
I lea foi aoauli sa faamalieina le aofia i faafiafiaga matagofie felanulanuai na saunia e le tupulaga AUK, Restoration ma uso palagi.
Peitai a o lei lomia lenei ripoti, sa toe faateia nei lava pitonuu i le Aso Gafua, aso 13 Iuni ina ua toe osofaia i nisi luluga o mafui‘e malolosi e lua lea sa motusia ai eletise ma le suavai aemaise le palapala to‘a.
Ma ua sili atu mafatiaga i le taimi nei e ui ina leai se soifua o maimau. O loo iai pea nai aiga i pitonuu Sasa‘e o loo motusia pea le suavai, e foliga mai e lua laa i luma ma toe laa i tua.
