O loo loma le faamanatuina o le 40 tausaga o le aoga a Pope Paulo VI i Samoa i le masina o Novema 2012, ma o le auga tonu lea ua tapenapena mamao atu ai tamaitai tuai o le Kolisi o faavaeina se Asosi i Brisbane nei.
E lē gata i lea o le fesoasoani pea lea e faatupeina nisi o sikolasipi poo fanau o a‘oa‘oina i le Kolisi sa faafailele mai ai lo latou soifua a‘oa‘oina i Samoa i tausaga ua mavae.
O nei faamoemoe uma e lē muta ai le agaga fesoasoani, ona o le sailiga seleni auā le faiga malaga a le Asosi mo Samoa i le tausaga fou. Fai mai la latou mau, e lē mafai ona faatali i le minute mulimuli auā e ono lē lava le taimi, ma faaoso popolevale ai i latou, ae o le taimi lava lenei e faatino ai manū o maua le avanoa ma tele le taimi.
Na matuai faatumulia le po o le Aso Toonai ua tuanai i le fia pulupululima faatasi o le atunuu e opogi le faamoemoe. Na sii mea i Matautu Sa e lana afioga ia Patele Epati Tamati, ona alo loa lea o le Asosi e faafiafia le aumaimoa.
Na faatāuaina laei faa-Pasefika ma sa lagolagoina e le Sina World Travel (Lemalu Patricia ma Steve Sevele) faapea le Domestic Cleaning a le susuga ia Iakopo ma le aiga ma nisi o Kamupani sa mafai ona ofoina fesoasoani mo le Asosi.
Tulaga Muamua i le Alo‘a o alii na maua e Tagaloa, o le tama tuai o le kolisi o Chanel, lea na ia maua ai le pepa malaga fua i Samoa ma toe foi mai faapea le tupe faameaalofa e $200.00.
Tulaga Lua i Alo‘a na faamanuiaina ai le susuga ia Lisati, na ia maua le voucher tala fua ai ni oloa ia Good Guys (TV poo se pusa‘aisa).
Laei faa-Pasefika na maua e le faletua ia Talosaga mai le Sunshine Coast, e malaga fua i Hawaii ma toe foi mai faapea le $200.00 tupe faameaalofa.
Tulaga Lua na maua e le Faatonu o le Miss Samoa Ausetalia, Taleva Koleta Galumalemana, na ia maua le pepa e tala fua ai oloa i le Hi Fi (TV, pusa‘aisa poo se stereo).
O le puletasi sili ona matagofie na maua lea e Fia Taefu sa tauaaoina le $200.00 na faameaalofa mai e le ofisa malaga a le Sina World Travel.
O le komiti o le Asosi a teine tuai i Brisbane e to‘a 12 i latou, ma o le laulau lenei a le Asosi: Peresitene – Sitika Lemana Satui; Sui Peresitene – Telesia Leota; Teutupe – Tili Fata Tauilo; Failautsi – Polu Suiai
O le Sui peresitene ia Telesia Leota sa fai ma fofoga o le po. Na foi le auvalaaulia ma le malie atoatoa i le sasala o kuka a le fetalaiga ia Poulava Sam ma Lona Matautia o le Uncle Sams Catering, toe faamalieina foi finagalo i le faaili a le Simply Savaii sa faafiafia i lea afiafi.
