O le po o le Aso Toonai, sa iloga ona lē ofi ai le James Meehan Hall, Macquarie Fields, i le paia ma le mamalu o le atunuu, na lolofi atu e molimauina le toe foi mai o le United Band i ona faiva masani ai, talu mai le lua tausaga o malolo, ona o tuatuagia faaleaiga.
O le masina o Novema i le tausaga nei, o loo faamoemoe e faailoga ai le luasefulufitu tausaga o la latou tautua, e tatala ai foi ma le latou CD lona fa. O le faili lenei, e faamemelo i ai Samoa i Ausetalia, ona e siufofoga mālie ma a latou fatuga eseese faamalie finagalo toe maopoopo lona faatautaia.
O le taitai o le fa‘ili, o le Afioga Tupuola Mati Faiaoga Leifi, (vocals), ma nai ona uso o Pule Filipo Leifi (vocals & guitar), Nimo Leifi (vocals & bass guitar), Adam Leifi (keyboard) mai Fasitootai, Saleaumua, Lalomanu.
O lo latou tausoga o Suemalo Saipisa Papalii (drum machine) o Aopo Savaii, ma si tamaitai o Clara Silva (keyboard) o Faleula.
Na fofogaina le po e le Faatonu o le Leitio, o le Siuleo o le Samoa na Galo, Tagaloa Seiuli Faleao Paulo Autagavaia Vaai. Na maualuga le faamoemoe, ona o le faamalumaluga a le Peresitene o le Stake a Macarthur, le susuga Salesa Tupou o le Tonga, susuga i le Epikopo o le Uarota 4 Campbelltown, Bishop Faigatasamoa Mataipule ma lona fesoasoani Lofisa Maselusi Taanoa.
Sa auai atu le Peresitene o La‘u Samoa Society, Alalatoa Emani Alalatoa, Sui Peresitene, Tauo Siaki Toomata, le pule o le Toomata Funeral Services. Toatele foi le au faipisinisi a le atunuu, o uso a faili e pei o le Local Savaii, Molī o le Ava, ma le Vaalele.
O le fiafia tele o nai isi paaga a le faili, na lē kea ai i le taugata ma le mamao o Brisbane, Melbourne, Canberra ma New Castle, ae masii mai le tapuaiga.
O le aao foai o le atunuu na alofagia ai le faili ma lo latou faamoemoe e $18,000, le tupe mamā.
E pei o upu e masani ai, a lotogatasi e maopoopo ma lelei se taumafaiga, ona e lē gata o le faili a le aiga, ae faapea foi ona ogatasi o latou siufofoga i le faafofogaaga a le atunuu. Ia manūteleina ou faiva, le faili tautaua a le United Band.
