E tolu maliu ua faamaonia mai e le Ofisa o Leoleo i le vaiaso ua tuanai.
O le tamaitai Filipaina na malaga mai i se vaalele laititi a le Polenisia i le amataga o le vaiaso na te’a nei ua talia nei ni feutagaiga e toe faafoi ai i lona atunuu.
O le taotoga faapitoa na faatautaia i le falemai tele i Motootua na faamautu ai o le fatu o lea tamaitai na mafua ai le maliu. O loo taumate na iai se faaletonu i lona fatu i le taimi o le faigamalaga mai i Samoa nei na maliu ai ma e tulaueleele le vaalele faato‘ā manino ai le kamupani ua maliu lea tamaitai.
Na faaalia e le sui sooupu o le Matagaluega o Leoleo ma Falepuipui, Leaupepe Fatu Pula, o le faigamalaga mulimuli a le Polenisia i le Aso Gafua ua tuanai na malaga mai ai lea tamaitai. Na faanatinati atu i le falemai peitai na faamautu ai lava ua maliu lea tamaitai.
O le ofisa o le va i fafo a Samoa nei o loo fesootai nei ma le Ofisa o le malo o Filipaina i Ueligitone auā le toe avatu ai o le tino maliu o lea tamaitai i lona atunuu.
O le maliu lona lua na faamautu mai e le Ofisa o Leoleo o se alii lea mai i Toamua, ua faamautu lona pule i lona lava ola. Faaalia e le Ofisa o Leoleo o se feeseeseaiga i le va o lenei alii ma lona faletua lea ua masalomia na mafua ai lea faalavelave.
O le tasi lenei faafitauli ua vaaia le toe alia‘e foi i lenei tausaga ma o se eseesega lava ua tele i tagata matutua ua fai toalua ma o alii lava ia ua tulai mai ai lenei faafitauli. O loo faatalanoaina le aiga o lenei alii ona o aafiaga ua tulai mai ona o le faafuaseia o le toesea o le tamā o le aiga.
O le isi maliu na faamautu mai o se tamā mai le afioaga o Afega. O le tamā na agai e fagota i le po o le Aso Toonai peitai o le mae‘a o le po e lei toe foi atu na amata ai loa ona saili nisi o taulelea o le afioaga, ma o le faamatalaga faato‘ā maua lona tino maliu i le aso na sosoo ai.
Ua faaalia e leoleo o le maliu ua mafua ona ua malemo le tamā ae e lē o taofia ai se taotoga faapitoa ua faatautaia pea ona o le fia faamaonia atili o le mafuaaga o le maliu o lea tama.
E iai le isi maliu ua masalomia ai foi le malemo o loo tālia foi le faamautu mai e Leoleo.
O se tamaititi e 14 tausaga mai i Magiagi – na agai atu ma lona uncle ma se tasi o ona tausoga e fagogota i le Aso Gafua i gataifale o Vaiala.
Na tāpā ane se fesoasoani a taulelea o Vaiala ina ua fiu e su’e le tamaititi sa i le sami faatasi ma le isi ona tei a o fagota lona uncle. Na sao le tausoga ae o le tamaititi lea e 14 tausaga na taunuu atu i le falemai i Motootua ua uma lona ola.
Faaalia e le aiga o lea tamaititi e faato‘ā atoa le masina talu ona oo atu lea tamaititi ma lona aiga ma faamautu i Magiagi a o lea ua tulai mai ai lenei faalavelave. Ua fa ai i lea tamaititi i latou ua maliliu i le sami i le masina lava ia o Iulai.
