“E tatau ona lelei le tau mo le au faifaatoaga i Samoa”
Ua faaalia le fiafia tele o se tasi o fai faatoaga i Samoa i le taunuuga o taumafaiga mo le toe tatala mai o le maketi i Niu Sila i le talo mai Samoa, auā o se fua tau faatoaga sa luu tupe ai i tausaga ua mavae a o lei osofaia le talo a Samoa e le faama‘i lega.
“Ou te lagona o se faamanuiaga sili lea mo matou o loo toe taumafaia le talo aua e mo’i o loo maua seleni i le faatau i le maketi, ae le tutusa ma tupe e maua pe a toe la’u nei i Niu Sila”.
O le finagalo lea o se tasi o fai fa’ato’aga mai le nuu o Savaia i Lefaga ua le mana’o e fa’alauiloa lona suafa.
O se tasi lea o faifaatoaga na ave lana talo i le pusaoloa e tasi sa ave atu i Niu Sila i le masina na tea nei, sa faataitai ai le talo mai Samoa poo ua lelei ma ausia aiaiga o tulafono tau faatoaga a Niu Sila faapea tulafono e puipuia ai faamai.
“E selau valusefulu taga na ave, ma na matuā faamalieina lava i latou o vaaia ia vaega i le tapenaina atu o le uta lea”.
O le kamupani e ta‘ua o le Progressive sa totogiina le uta muamua faataitai, lea sa latou tufatufa atu taga talo i nisi o faleoloa i Niu Sila e faatau ai.
Ua faaalia e se faifaatoaga na malaga i le aveina o le uta faataitai, o Setema o le a toe ave ai le isi uta ma e manaomia tele ai ni pusaoloa pe lua pe tolu, ae o le fesili o loo tuta‘ia ai nei le faitotoa ua matala mai, pe faamata o gafatia e Samoa le faalausosoo o uta talo i Niu Sila, auā e manaomia e faleoloa ma kamupani o le a latou faatauina le lē motusia o le alu atu o le talo mai Samoa.
“Tasi lena tulaga faigata o loo iai nei, auā e oo loa ina saoasaoa ane le talo a Fiti ona faigata lea.
I lalo o se polokalame sa fesoasoani ai le Malo o Samoa e ala i le matagaluega o faatoaga, sa tufatufa ai tiapula o ituaiga o talo e lima ua filifilia e lelei tele mo le maketi i Niu Sila.
Peitai o le uta faataitai na ave i le masina na tea nei, e na o le lima sefulu taga talo na maua mai ai, auā o le tausaga na tea nei na amata totō ai tiapula o ituaiga e lima o talo ua filifilia.
O le molimau a se tasi o faifaatoaga, atonu ua lē tele ni taga talo na maua mai ia i latou na tufa i ai tiapula, ona ua vave fafai ona faatau lea ae lei oo i le taimi e ave ai le uta faataitai.
O le afioaga o Savaia o loo totōina le talo Savaia o loo lavea i ituaiga e lima o talo ua filifilia na aumai ai le tele o talo na maua ai le 180 o taga na ave i le uta faataitai.
O le afioaga foi lea o loo naunau e fia saili so latou lava faitotoa e ave ai le latou talo i Niu Sila. Peitai o le tau o loo faatau ai le taga i le uta muamua le uta faataitai, e lē o talia gofie e le au faifaatoaga a lea afioaga.
O le $33 tala i le taga 20 kilo na faaalia e se tasi o faifaatoaga e lē fetaui, ae a maua le $50 i le $60 tala ona tau fetaui lea ma le tautiga o loo atina‘e ai maumaga aemaise ia tau tutusa ai ma tupe o loo maua pe a faatau a latou talo i le atunuu i Samoa.
