A o faagasolo galuega faaauau a le Malo ma le Iuni o Europa i le fesootai ai o le suavai maua, ua iai foi se isi afioaga ua faaalia lo latou manaoga ina ia see ese mai i le Pulega o le Suavai a le atunuu – le Faalapotopotoga lea a le Malo o loo ua pulea le suavai maua ae ua iai le manaoga ina ia mafai ai ona tutoatasi.
O le vaiaso lenei e faamautu ai le manaoga o le afioaga o Fusi i Safata i le see ese ai mai le vaaiga a le Pulega o le Suavai ae tutoatasi loa le faatinoga atoa o lona suavai maua.
O le tasi lea o afioaga e tele le suavai o loo maua mai ai i ona vaitafe ma o loo ta‘i mai ai le vai maua i le tele o le itumalo o Safata.
Peitai ua faaalia e tamā o le afioaga, o loo faaauau lava le faaletonu o le suavai maua i totonu lava ia o le nuu.
O le nofoaga o loo tapu‘e mai ai le suavai ua ta‘i sa‘o lava i isi afioaga ma o loo feagai pea Fusi ma faafitauli i le lē lava o le suavai maua.
O le talosaga la a le afioaga na fai aga‘i i le Iuni a Europa lea la ua tali mai le Iuni e lē mafai ona maua mai se fesoasoani tuusa‘o atu ia Fusi Safata talu ai o loo i lalo o le Faalapotopotoga o le Pulega o le Suavai lea foi e faagasolo lava le faatinoga o galuega faalelei o le suavai i afioaga i tua e pei ona faatupe mai e le Iuni a Europa.
O le vaega lenei ua ta‘ua o afioaga o loo pulea tutoatasi o latou suavai ua silia i le 50 afioaga o loo aofia ai.
O nuu nei ua tuu sa‘o atu lava e le Malo ma le Iuni a Europa tinoitupe auā le ta‘iina atoa mai o le paipa mai nofoaga o loo tapu‘e ai le suavai aga‘i i o latou afioaga.
E $300 afe tala le tupe o loo talosagaina e le afioaga o Fusi Safata mo lenei faamoemoe ona o le manaoga o le a faatau ai paipa ina ia mafai ona ta‘i sa‘o mai lava le suavai mai i o latou vaitafe auā le suavai maua a le mamalu o le afioaga.
O le faaiuga la o le vaiaso na tea nei lea na feiloai ai loa tamā o le nuu ma le Pulega o le Suavai ona o le fia faamanino o le itu lenei, e lei iai se maliega ua sainia ina ia vaaia ai e le Pulega o le Suavai le faatinoga o le suavai maua a lea afioaga.
Ua fuafua nei la o le a faamaonia le faamatuu atu o le tulaga tutoatasi o Fusi Safata pe a mae‘a se isi feiloaiga mulimuli ma le Pulega o le Suavai i le vaiaso nei.
O le faia o lea tulaga o le a faato‘ā mafai ai loa ona faatino le talosaga lea ua tuu atu i le Iuni a Europa auā le fesoasoani sa‘o atu i le afioaga ma le faatinoga o lana galuega mo le faaleleia o le suavai maua i aiga o Fusi Safata.
