Ua mae‘a nei se galuega tele sa feagai ma se Komisi Suesue faapitoa na tofia auā le aoina o finagalo o Samoa e faatatau i le ono tuuitiitia o le numera o suafa matai e faasafua e aiga.
O se mataupu na lāgā o se vaega o le faamāmā avega, lea ua unaia e le Malo mo aiga ma tagatānuu uma o Samoa.
O se finagalo lenei ona o le vaavaai o le Malo e pei ona faaalia i taimi ua tuanai, o le a aveese le mamalu o suafa matai i le soona faasafua solo.
Ua iai lava faataitaiga o aiga e tasi se saofai ae ua sili atu i le to‘a 100 i latou e nofo ai. E lē gata i lea ae e foliga mai ua saili tupe ai nisi i lenei ituaiga faiga.
O se mataupu e ma‘ale‘ale ma sa amata finauina lava ina ua faaalia e le Malo lea tulaga.
O le vaiaso la lea ua tuanai atu na faamae‘a ai loa faatalatalanoaga a le Komisi Suesue lenei ma le mamalu o le atunuu na maua le avanoa e velo ‘aso ai ma faaali atu se finagalo i lenei mataupu.
O le Taitaifono o le Komisi Suesue lenei o le afioga Leapai Lau Asofou Soo, o le alii pule o le Iunivesite Aoao o Samoa. Na faapea foi ona tofia nisi o tulatoa o Samoa latou te tuufaatasia se lipoti i le mae‘a ai o nei feiloaiga ma le mamalu o le atunuu ona tuu atu lea i luma o le Palemene auā se vaavaai i ai.
E felanulanuai tali a le atunuu na faatalatalanoa e pei ona faaalia e le afioga Leapai.
O se tasi lava o atugaluga o le toatele na ia faaalia ona e foliga mai o le a aapa le Malo e faatulafono mataupu ua iai se finagalo o le toatele o measina ia e patino lava i aiga ma suli o se suafa.
O le isi atugaluga ona o le taitasi o suafa matai e faasafua o le a lē au ai isi suli i suafa ua faasino i o latou aiga. E lē gata i lea ua tele foi finauga i le itu lea o le tasi o le nofo mai i suafa tāua o aiga, afioaga ma itumalo.
O le mau a nisi o se faiga lenei a le Malo ina ia mautinoa ai e tasi lava le matai e mafai ona o latou fesagai pe a faagasolo nei le faamoemoe ina ia faaaogā fanua Samoa i atina‘e a le Malo ma o le a mafai ona faatino ai nonogatupe ma faia o ni fanua umia saoloto.
O le tele o i latou e suafa ai i igoa patino i eleele o se aiga, o le a lavelave ai foi feutagaiga ma faafaigata ai ona faatino ni atina‘e i fanua o loo tutū e aunoa ma le atiina a‘e.
Mo i latou o loo lagolagosua i le finagalo lenei o le Malo o le vaavaai lea i le puipui ma le aputiputi mai o tu ma aga faa-Samoa ua manatu ai, e tatau lava ona tumau i le faavae sa sau ai le tele o suafa nei, sa tasi lava lē e avea ma Sa‘o o se aiga, e tasi foi le tagata e faasino i ai suafa tāua o aiga, seia vaganā ua maliu ona see foi lea o lea faaaloalo i isi suli.
O nisi ua finagalo o le a faatāsina ma aveese ai le faatāua sa ave i suafa tāua o aiga ona ua toeitiiti lava tofu uma tagata o se aiga ma le suafa matai lea e tasi. E finau nisi o le tele o suafa matai o le faamāmā avega lea i saogamea mo nofo poo faafotutupu.
O le lipoti la o le a saunia e lenei komisi suesue o le a mafai ai foi ona vaavaai poo ā tonu lava suiga o le a faatino ai lenei mataupu pe afai e oo i le Palemene ma unaia ai loa le manaoga ina ia faatulafonoina le tele o gaioiga ua faatino ai le soona ave o suafa matai i suli.
O le finauga a isi e faitalia lava le aiga latou ma le latou filifiliga i le faasafua ai o suafa matai o aiga.
O isi lava aiga ua faia ona o le manumanu i fanau lalovaoa o soo se aiga, ina ia ave i ai le faaeaea lea, ma o le a luitau ai foi aiga ina ia mautinoa e fai sao uma i le atina‘ega o o latou aiga.
