A o agai le pikiapu double-cab a le afioga Patele Petelo i Lotofaga sa taofi ane e se tamaititi e iva tausaga o le aoga tulagalua a le ekalesia Katoliko i Falefa, mo se lifi e fia alu ai i lo latou aiga i le agai i Falevao.
Na tu iai le pikiapu ma oso ane i tua le tamaititi i le vaega o iai le pusa ma nofo ai. Ina ua iloa e le tamaititi ua lata i lo latou fale na ia po po, le taavale a le alii faifeau. Peitai e lei tu le taavale ma e iai le talitonuga o leoleo o le mafuaaga lea na oso ese ai le tamaititi ma le pikiapu ma aafia ai i ni manu‘a na oo ai ia te ia le maliu.
Na faaalia e leoleo i luma o le faamasinoga, e iai a latou molimau e toalua na vaaia le taavale a le alii patele o tietie ai le tamaititi, ma o le molimau a ia tagata e faapea sa la vaaia le tamaititi o po po le pikiapu. Na molia e leoleo le faifeau i le ave taavale faatamala ua mafua ai ona oo le oti i le tamaititi. Peitai ina ua suesueina le moliaga sa finauina e le loia a lē ua molia, pe mafai faapefea e le itu tagi ona faamaonia o le faatamala o le patele na mafua ai le faalavelave.
Sa faaalia e le loia a le faifeau ina ua fofogaina le mataupu i le Faamasinoga Faaitumalo i Mulinuu i le Aso Lulu 28 Iulai 2010, e lei lagona e le patele na aveina le taavale le po po ane o lana taavale e le taamaititi, o le mafuaaga lea na lē tu ai, ae faaauau pea. Na faato‘ā iloa e le faifeau ua leai se tagata na nofo i tua ina ua vaai atu i le fa‘ata ua leai se isi.
Na toe liliu ma foi e vaai poo fea o iai, ae maua ai loa ua āfaina le tamaititi i ni manu‘a ma ia ave ai loa i le falemai lea na uma ai lava le ola o le tamaititi.
E leai se taotoga faapitoa na faatonuina e leoleo e pei o faalavelave uma e aafia ai le soifua o tagata, e faamaonia ai mafuaaga o le maliu, ma na tautino le alii leoleo sa finauina le moliaga, o se lape lea i tapenaga a leoleo.
Ae sa ia faaalia i luma o le faamasinoga sa faalagolago leoleo i le lipoti a le faamasino poo le coroner na ia faamaonia le mafuaaga o le maliu. Sa fesiligia e le alii faamasino o Tauiliili Harry Schuster, pe aisea ua lē faia ai se taotoga faapitoa auā e manaomia le lipoti a le fomai e suesueina mafuaaga o se maliu.
Sa leai se tala a le alii leoleo sa finauina le mau a le itu tagi. Sa na o le faamalie ane ma faamalulu i le faamasinoga i se lape o le itu a leoleo, ma ia tuuina atu loa se talosaga ina ia toe faaui i tua le moliaga o le alii faifeau. O le talosaga na talia ma talosaga ai loa le loia a lē na molia e faaleaogā le moliaga ma ua talia foi.
