“Leai se avanoa o fefaatauaiga i pisinisi o laau faasāina”
O Moli Maposua o se alii ua 50 tausaga o lona soifua ma sa nonofo ma lona toalua lea ua la tetea nei, i se faatoaga a se isi tagata i Tafaigata.
O Tesema o le tausaga e 2007 na alu ai se osofaiga a leoleo i le fanua sa nonofo ai, ma maua i ai laau faasāina o le maruana.
E 2,398 fatu o le laau faasāina na maua i le osofaiga, 32 lālā maruana ma laau maruana e 3 o ni lau o le laau faasāina ma se meafaitino e talitonu leoleo e faaaogāina e ula ai le sikaleti maruana.
Sa maua ai ma se laau malosi o le ituaiga o le revolver ituaiga o le 32 ma ni ututau poo pulufana.
O le masina o Iulai 2010 na suesueina ai molimau a leoleo e faamaonia ai moliaga o le umia o laau faasāina, umia o se mea faitino ma le faamoemoe e faaaogā i laau faasāina, ma le umia o se laau malosi e lē faatagaina faasaga i le alii o Moli Maposua.
O le lata ina mae‘a taualumaga o le faamasinoga na suia ai le tetee a Moli i lona ioeina uma loa o moliaga. Peitai o le faaiuga a le faamasinoga ua lē avea ai se faamamafa i lana ioega i ana solitulafono ona faato‘ā tuuina ane ae ua ia maua uma folasaga o molimau a leoleo.
Faaalia e leoleo ia latou suesuega ni mau na iloa ai sa faia e Moli se pisinisi sa faatau atu ai i tagata le laau faasāina.
E faamautuina lea mau i molimau na tuuina atu i le faamasinoga na faaalia ai le vaaia pea o taavale a tagata e agai i le fanua sa nonofo ai lē ua molia ma lona toalua muamua, ma e tasi lava le talitonuga o taavale uma ia a tagata sa faatau maruana.
Faaalia e le alii faamasino o Justice Pierre Slicer, o loo manino aiaiga o le tulafono tau i fualaau ma laau faasāina i le tatau ona mamafa o se faasalaga mo i latou e tele se aofaiga o ni laau ma fualaau faasāina e maua o latou umia, ae pe afai foi o loo fuafua mo se fefaatauaiga e maua ai ni tupe i se auala faapisinisi.
E faapea foi le silasila a le faamasinoga i le faamasinoga o Tagaloasa Filipaina Faisauvale ma molimau na tuuina atu i lona foi aafia i faiga faapisinisi i le maruana.
O le matuiā o moliaga o Moli Maposua ona sa nofosala muamua i ni tausaga i le falepuipui ona o solitlafono e pei o le faaoo manu‘a, faaoolima, gaoi, ma le toso teine.
O I e silasila ua talafeagai se faasalaga faafalepuipui e fai si mamafa, lea ua nofosala ai i le 4 tausaga mo moliaga e lua o le umia o laau faasāina ma le umia o se mea faitino e fesootai ma laau faasāina. O le moliaga o le umia o se laau malosi poo se a’upega e le faatagaina e 18 masina i le falepuipui.
E tuli eseese ia faasalaga e lua, ma o lona uiga a tuufaatasi e lima tausaga ma le ono masina ua nofosala ai i le falepuipui.
O le taimi ua mae‘a ona lau le faaiuga ma tuua le potu faamasino e le Faamasino ma le Lesitala, na molimauina e nisi o tusitala le toatamai ma le faalii o le alii o Moli Maposua ona o le tele o tausaga o lona faasalaga.
Na ia tulei ese ma toso i tua le pa mo tagata solitulafono sa nofo ai i totonu.
