O loo sailia pea e Tupaisina Jesse James le pule sili o le South Pacific Development Group ni paaga faipisinisi e fia lagolagoina le fausia o se faletalimalo tele i Sasina i Savaii e pei ona mautu nei le lisi o le 600 eka mo le 120 tausga.
Ua faaalia e le pule sili le faaauau pea o ana sailiga mo paaga faipisinisi ina ua alia‘e mai i ni tusitusiga i luga o le upega o fesootaiga a lana kamupani ni tusitusiga ua atagia mai ai, e iai le sao o le South Pacific Development Group i le fuafuaga a le Malo e faatuina ni fale kasino i Samoa.
O loo teena e Tupaisina Jesse James le iai o se piitaga o le Malo i le fuafuaga a lana kamupani i le fausia o se kasino, ae ua ia faailoa o se tasi lea o fuafuaga o lana faletalimalo ia iai ma se kasino.
O le tauaofiaga o loo sosoo ai nei a le Palemene o loo iai le talitonuga o le a avatu ai i luma ma le tulafono taufaaofi o kasino mo le faitauga lona tolu ma pasia loa.
Ua faaalia e le Pule Sili o le faamalu o faalapotopotoga tuma‘oti i Samoa le SUNGO o loo tumau pea le tetee a le faamalu i lea fuafuaga a le Malo, ma o loo faia pea a latou tala‘iga i tagata i nuu ma afioaga i aafiaga o le a latou feagai pe a faatu ia nofoaga mo taaloga faitupe i le atunuu.
