O le kamupani inisinia o le Richardson Auto Service Ltd. i Stoddard Rd i Mt Roskill, o le a fetaiai ma ni suesuega faapitoa e tali ane ai i le polokalame a le televise tasi ua faaigoaina o le FairGo.
Ua mafua lea tulaga ona ua lē mafai e le tina ia Faamanu Schmidt o Henderson i Aukilani i Sisifo, ona onosaia le pepelo ma le tauoleole o le kamupani, e tusa ai ma le faia o tau o ana galuega masani.
Sa feiloai Faamanu ma le fale inisinia lea, ona o se tasi o alii Samoa sa galue faavaitaimi ai.
O le taavale a le tina sa manaomia le faaleleia o nai vaega sa faaletonu, ina ia maua ai le pepa faataga mo luga o le aualatele.
Sa muamua ona vaaia ma siaki e le alo o le atunuu na galue ai i le faleinisinia, ona faia lea o lana lipoti ma auina atu i le kamupani mo le faatinoina o vaega uma sa manaomia ona faaleleia.
Talu ai sa manao le tina ia Faamanu e tuuina le tau o le galuega i le matagluega a le WINZ mo le totogiina, o le mafuaaga lea na mafua ai ona alia‘e le faafitauli ma alilai ai foi ma le taamilosaga sa uia e le kamupani fai taavale.
Ina ua muai feiloai le tina ma le kamupani, ona tāpā lea o le tau atoa o le galuega e fia talosagaina ai le matagaluega mo le faaune ane ai o le seleni e tusa ma le manaoga.
O le tau atoa sa tuuina ane e le kamupani e tusa ma le $960, ma o le tau foi lea sa aofia ai ma le totogi mo le faapipiina o totoga ma vaega uma o le galuega (labour).
O le lisiti mulimuli o le pili atoa a le tina ina ua mae‘a ona faia le galuega, sa maitauina ai le uigaese o le tau o totoga sa lisiina, aemaise ai e lei oo le tau o le galuega i lona faaopoopoina i le $960 e pei ona sa faamatuu ane e le WINZ.
Peitai na toe suia e le kamupani le faiga o le tau o le galuega, ina ua toe faaopoopo i ai le 6 itula sa faaalu mo le galuega, ae $60 i le itula sa tau faapaleni ai agai i le $960 ua mae‘a ona totogiina.
Sa fesiligia e le tina lea faiga pe aisea ua toe faaopoopo ai le labour, peitai sa iai le tau o le labour a o lei tuuina le tau atoa o le galuega i le WINZ.
O tasi lea tulaga sa lē mafai ai ona faamalieina ai le tina i le tali sa tuuina ane e le fale inisinia. Sa feseseai solo faamatalaga a le alii pule ma lona faletua ina ua feiloai atu i ai le Samoa Times ma tau saili se fofō o le faafitauli.
E ese foi le tali a le kamupani sa tuuina i le tina ina ua fesiligia le tulaga lava e tasi, ma ua avea ma mafuaaga ua matuā lē talitonuina ai e Faamanu soo se isi tala e toe tuuina ane e le pule ma lana pulega.
Sa taumafai foi ina ia maua i tua se feiloaiga ma faia nisi maliliega ina ia faamalieina itu e lua, peitai e foliga mai ua faigata tele ona toe faafoi mai se vaega o le tupe mai le fale inisinia, ma ua lē mafai foi ona toe talitonuina e le tina le toe faatinoina o nisi galuega mulimuli a lea kamupani.
O le isi tulaga sa matuā lē fiafia ai Faamanu, ona o lona talitonuga e tusa ai ma lona faaaogāina o lana taavale talu ona toe faafoi ane, e leai lava ma se suiga o vaega sa manaomia le toe faaleleia.
Ae sa toe fesootai i ai ae faapea ane le tali, e toe faafoi ane se‘i toe vaai i ai ma toe siaki.
E lei mālōlō foi le tina i le saili solo ma talanoa i le tele o isi kamupani e faatauina totoga sa manaomia o le galuega.
Ona o le naunau lava o le tina e fia maua le tau sa‘o ma le faamaoni o vaega sa sui e le fale inisinia.
Na matuā ofo le tina ina ua maua ane le tau mai kamupani sa fesootai i ai ma iloa ai toeitiiti lava faaluaina ma faatoluina le tau o totoga sa faalisitiina e le fale inisinia mo lana galuega.
O faamaumauga ma pepa sa tuuina mai i le Samoa Times, na faamaonia ai foi le tatau ona toatamai le tina, ona o le tele o le faaletonu i le faiga o le tau o totoga, ma le tau o le totogi o itula sa faaaluina, aemaise ai le lē taitai ona oo i se lima itula e faatino ai le galuega sa faia.
Ua taunuu le mataupu a le tina i le FairGo e pei ona ta‘ua, ona o le manatu lava o le tina, se‘i iloilo pea ma faafetaui lava le kamupani amio piopio ma le talapepelo.
E lē o toe mamao ae tau lau ma faatinoina loa le mataupu a le tina e lea foi polokalame e tusa ai ma se tala mai a le FairGo.
