Ua faitau aso nei ona faia lea o le faigapalota tele a lo tatou atunuu ma o se palota muamua lenei i Samoa ua oo ai le numera o sui tauva tamaitai i se aofaiga maualuga e 24. O se faigapalota foi ua faaaogā ai le aiaiga fou o le Faavae e faaatoa ai le lima o nofoa o tamaitai i le Palemene pe a lē maua lea aofaiga mai faaiuga o faiga filifiliga a itumalo faaalalafaga e 49.
O le a iloa ai foi ma le faaopoopo o numera o nofoa o le Palemene mai le 49 i le 50, poo le oo lava i le 53. Ae afai e manumalo uma mai le itupa o alii i nofoa e 49 o le Palemene o loo iai, o lona uiga o le a faaaogā loa le teuteuga o le faavae e sailia ai ni faipule tamaitai se toalima ma maua ai le aofaiga o nofoa o le Palemene e 55. Peitai afai e maua le toalima o sui faipule tamaitai i faaiuga o faiga filifiliga a itumalo e 49 o le a tumau pea le aofaiga o nofoa o le Palemene i lea aofaiga.
O le tulaga mataina lea o le a tulimatai nei i le faiga filifiliga a le atunuu mo sui tamaitai ua faaulu suafa e tauva i nofoa o le Palemene. O tapenaga a le Samoa Ala Mai le mafutaga a nisi o tina ma tamaitai ua latou tapena le lotoifale o sui tauva tamaitai mo le palota na latou valaaulia ai le faipule tamaitai o Amerika Samoa le afioga Aumua Amata e saunoa i le latou faatasiga faaleaoaoga, se‘i sasaa mai ma faasoa i auala sa ia uia i ana taumafaiga mo le fia oo i le tofi faipule o Amerika Samoa i totonu o Uosigitone i Amerika.
E pei ona silafia o le tofi faipule lea sa umia e le tofa Faleomavaega Eni Hunkin i le tele o tausaga, ae sa toilalo i se tasi o faigapalota a le Teritori i le sailia o le tofi faipule o le Konekeresi lea na manumalo mai ai Aumua Amata Coleman.
I le saunoaga a le tamaitai faipule sa ia faailoa ai e lei faigofie lona taumafai ma na lagona ai le musu. Peitai sa fautua pea nisi o tamalii ma Ponaoo sa lagolago malosi ia te ia e aua le fiu gofie.
“E sefulutasi tausaga o o‘u taumafai ma sa lagona ai ua oso mai le musu, ae peitai o le lagolago mai pea ma le fautua mai o tamalii ma nisi o ponaoo sa ou taumafai ai pea seia oo ina tini lo‘u faamoemoe ma ua ou talitonu i ai”. O lana lui i tamaitai o Samoa e lē o se taaloga e maua gofie ni ona ‘ai auā a lē tigaina ma olooloia e lē maua se ‘ai o le taumafai.
Na faailoa ai foi e Aumua o le taimi e sao ai se tamaitai i tofi faipule e pei o ia, ua lē iloga se mea e sii i ai viiga. O suafa taupou uma o le atunuu ua faalagi ai aemaise ua tau lona gafa i aiga uma o Samoa. O avanoa o pasi, taxi ma vaalele faapea soo se auala o feoaiga ua avatu le faamuamua.
E manino mai i le saunoaga a Aumua o uiga ia o le soifuaga mai le taimi e lei taualoa ai ae a oo loa ina pale i ni tofi o taitai o le Malo ma le atunuu se tamaitai, ua sii ma faatietie i luga o le maa salafalafa e pei o upu a failauga ma faleupolu o le atunuu.
Ua teu nei ma afifi e sui tamaitai o le a tauva i le palota a le Malo Tutoatasi o Samoa nei fautuaga ma timaiga auā o le latou oso lelei lea ia latou tapenaga.
Sa valaaulia foi le afioga i le Palemia o le atunuu mo sana saunoaga e tatala ai le mafutaga lea sa ia fautua i sui tamaitai, o le taimi lenei ua suia atoa o latou foliga i le laufofoga fiafia. Teu le amio ma tausaafia i taimi uma i le silasila mai a le itumalo ma le nuu. O vaaiga uma o loo tulimatai e tagata palota pe faapei le sui pe o se tagata mata atatata ma alofa.
O suafa nei o tamaitai e to‘a 24 ma itumalo e 15 o le a tauva ai:
Aana Alofi Nu.1
Lolomatauama Eseta Mataituli
Lefaga ma Faleaseela
Lemalu Nele Leilua
Lemalu Leatuavao Silivia Taupau
Unasa Tauaipolu Iulia Petelo
Lotofaga
Fiame Naomi Mataafa
Aleipata Itupa i Lalo
Faagasealii Sapoa Feagiai
Vaimasanuu Zita Martel
Anoamaa i Sasa‘e
Alai‘asa Elena
Alai‘asa Elisapeta Petelo
Faasaleleaga Nu.1 i Sisifo
Gatoloaifaana Amataga Alesana Gidlow
Vaasilifiti Moelagi Jackson
Faasaleleaga Nu.3
Uanasa Faapupula Metuli
Gaga‘emauga Nu.2
Semau Faamau Levi
Seuoti Sheryl Fialuma Laauli Siliniu Muagututia
Gagaifomauga Nu.1
Faimalotoa Kika Iemaima Stowers
Gagaifomauga Nu.2
Manuta Lavamaile Uesile.
Gagaifomauga Nu.3
Faaulusau Rosa Duffy Stowers.
Alataua i Sisifo
Aiolupotea Taatiti Visekota
Aliimalemanu Alofa Tuuau
Tuifaiga Loluama Yoshida Tuimaualuga
Palauli i Sasa‘e
Fiso Eveline Faamoe
Fiso Taranaki Mailei Tamasese
Itumalo tu Taulaga Sasa‘e (Vaimauga)
Namulauulu M Nuualofa Tuuau-Potoi
Pulemagafa Toleafoa Ulugia Mara Coffin Hunter
