O le aso lava na faalauiloa ai le litaea o Alex Leapai (Lionheart) na pa mai ai se tala faanoanoa i le maliu o si ona tuaa ia Faatau‘i Leapai i Samoa.
E lē o toe po se lilo i le faalauiloa aloaia ai o le litaea o le susuga ia Alex Leapai e pei ona faalauiloa aloaia ai e le ABC news i le taeao o le Aso Faraile ma luga o upega tafailagi.
Ua malolo Alex a o o ia se uluai toa i Ausetalia na ia lu‘ia le fusi o le heavyweight o le lalolagi talu mai le 106 tausaga.
O le mae‘a ai o le la taaloga ma Klitscko i le 2014 lea na malolo ai, o iina na tau afaina mai ai lona fofoga taumatau ae na faamautinoaina i se saunoaga a se fomai faapitoa e faapea, afai ae faaauau pea lana taalo i le faipele o lona uiga e telē se ono afaina o lona mata taumatau ma iu ina tauaso ai pe po lana vaai, lea na tonu ai i lona manatu ma faia loa lana filifiliga tonu.
O le manatu o Alex, o tupe ma le lauiloa e lē fesoasoani mo ia pe a alu i le wheel chair. Ua auai ma finagalo malie foi i ai lona faiaoga o Noel Thornberry ma ua alagatatau le faaiuga ua ia faia.
E 30 manumalo o Alex Leapai, 7 faia‘ina, tolu na draw i le 40 fusuaga faapolofesa ina ua mae‘a ona faalauiloa i le 2004.
E salalau le tala i luga o Televise ma upega o fesootaiga i le Aso Faraile lava lea ae faate‘ia ai le toatele i le pa mai o se tala faavauvau ua maliu faafuasei si ona tuaa ia Faatau‘i Leapai i Samoa.
Na maua se taimi e talanoa atu ai a tatou tala fou isi ona alo le tamaitai o Stephanie Leapai, peitai le mautonu lona manatu i le mea ua tupu.
Na ia faapea mai se talanoaga puupuu i le Aso Faraile, e lē o mailoa lelei le mafuaaga e pei ona auina atu ai i le falemai i le po o le Aso Tofi a malama le vaveao o le Aso Faraile lea na maliu ai lava.
E tusia lenei ripoti ua i Samoa nisi o le nofoaalo ae o le Aso Gafua na tea nei na malaga ai Fuamatu Alex ma le faletua e fia faamavae atu i si ona tuaa.
O se tala e nutimomoia ai loto o alo ma fanau faapea le tausi ia Leitu ma aiga uma ona o le faafuasei ona momotu o le mafutaga mafanafana.
E moni lava upu masani, “E toli le moto e fa‘i foi le matua”.
E manatua pea le tofa ia Faatau‘i Leapai i taimi e taunuu mai ai e tapena si ona alo mo ana taaloga i Ausetalia, e tatau lava ona maua se fesootaiga a o lumanai se taaloga a Alex Leapai.
O se tamā aga mālie ma tausaafia e le toatele o tagata i si ana ataata ae sili ai lona loto alofa ma le tele o ana galuega lelei na mafua ai ona tuua Kuiniselani ae masii atu ma si ona aiga i Samoa, ona o le fia faasoa atu o le manuia i nai aiga ma nuu e ala i ana pisinisi faleoloa.
Tau ina ia faamaise le agaga o le Atua ma faamafanafana i le tausi ia Leitu Leapai ma le nofoaalo faapea aiga faanoanoa o tagi mai ala ona o le misia o mafutaga ma le tamā ia Faatau‘i Leapai.
Amuia ē faanoanoa, auā e faamafanafanaina i latou.
