E leai se galuega o le fausia o se Malumalu tapuai e lē feagai ma ni luitau ma ni faafitauli poo faaletonu foi e taamilo ai le fili ma le tiapolo.
Ua masani foi lo tatou atunuu ma tulaga faapea e tutupu i taimi e amata ai ona talanoa le afuafuaina o se galuega tele o se Malumalu, ma e lē natia foi e iai nisi galuega na manumalo le fili ma iu ina vaemanua ai tapenaga amata, a o nisi foi galuega faapea e fai ma le oono ae faato‘ā aliali se to‘a i le ogatotonu poo le faaiuga o le galuega.
Mo le galuega o le fausia o le Malumalu fou ua umusa nei o le ekalesia Penetekoso o le Atoatoa o le Talalelei i Vaitele-tai, na saunoa le faafeagaiga, le Susuga To‘atuga Saofa‘igaalii, e iai foi faafitauli sa feagai ma le latou galuega.
“Aua o galuega tetele faapenei e tele ni mea o le a tulai mai ai.
E lē loto faatasi le ekalesia faatasi ma le faifeau, a o le mea sili ona tāua o le ta‘u atu i le Atua e aumai e ia se faaiuga. A aumai la e le Atua le faaiuga ae fono le ekalesia e malilie atoa ona faia lea o le galuega.
E iai foi galuega e fai fai faamaamulu nisi a o lenei galuega tele sa feagai ma i matou lea ua matou galulue ai, ua fesoasoani mai le Atua i soo se mea mai le amataga seia oo mai i le faaiuga”.
O le finagalo lea o le faafeagaiga ina ua amata le faatalanoaga mo le saunia o lenei lipoti, a o pisi nisi o le komiti a le aulotu e faatino nisi o galuega mo le tau faamae‘aina o ni vaega laiti a o lumanai le Aso Faraile, aso 8 o Aperila 2011 na umusa ma faaulufale ai le Maota Tapuai o le ekalesia.
Na faamatala le faafeagaiga, o le fonotele aoao a le ekalesia sa usuia i Compton i Amerika i le ta Tele luitau i le fausia o se Malumalu Tapuai usaga na tea nei 2010, na talanoaina ai e le aulotu le faamoemoe o le fausia o se Malumalu fou, ina ua manatu ua fai si leva o le falesa muamua, pe a fua i le 17 tausaga o galulue le susuga To‘atuga ma lona faletua faapea lona aiga i le tausia o le galuega.
Faaalia e le faifeau na sao Ietoga tetele le ekalesia i le faamoemoe e malaga le usugafono i Amerika ma ave ai mo le sailia o se latou tupe faavae.
O se tasi o ona tausoga e galue o se faifeau i le tausia o se tasi o ekalesia EFKS i Sanjose i Kalefonia susuga Sua Ga‘ote‘ote na ia fesootai i ai mo le faamoemoe.
Na ave ie tetele ma maua ai le latou siakitupe na faameaalofa ane e le faifeau EFKS e $25,000 tala Amerika.
Na faaliliu lea seleni ma maua ai le $60,000 tala Samoa ma o le vaegatupe lea na amata ai loa le galuega o le falesa.
Na saunoa To‘atuga o le tele o totoga o le Malumalu na faatau i Amerika na faaaogā i ai le seleni na maua a o iai i le fonotele a le latou ekalesia aoao i le lalolagi.
O se faamāmā avega lea ona sa faaalia e le faifeau na ia taumafai e maua ni tau feololo lea na aumai ai loa le pusaoloa poo se container o totoga o le fale aluga e oo i le fale‘alo ma faamalama ma le maamora poo le maa e fola ai le lotoifale o le malumalu.
O nisi o vaega o le galuega sa tauofo i ai le ekalesia e oo lava i le faletua o le faafeagaiga ma ona alo.
O ia ofo sa faatupe ai le sima atoa na faatau i Samoa faapea piliki, o faitotoa ma le eletise faapea ma isi vaega manaomia ma teuteu o totonu ma fafo o le Malumalu.
O le faafetai a le faafeagaiga ona a fua i le to‘a sefulufa (14) o matafale ma aiga e toalima sa faatinoina le tautua i fafaga ma isi vaega uma, e maeu le lagolago.
E na o le tolu masina ma vaiaso na fausia ai le Malumalu sa avea ai se tasi o faafeagaiga o le ekalesia AOG poo le Assembly of God, o Tulua Peti ma agai o tupu poo le tufuga na feagai ma le galuega.
O le tau o le galuega e lē itiiti ifo ma le lua selau afe tala Samoa. O le faafetai a le faafeagaiga ma lona faletua ia i latou uma na agalelei ma alolofa atu i le taimi na faato‘ā amata ai le galuega seia oo ina faatino ma oo ina mae‘a.
O nai o la aiga i Amerika Samoa ma le Iunaite Setete e aofia ai Hawaii, aemaise o le la aulotu mai lava i le au mautofi e oo i le lautele faapea le autalavou ma fanauiti.
