E moni ua lē o toe fou le faalogoina o lauga Samoa i totonu o lenei atunuu o papalagī, ae pei lava e tulaga ese i le faafofoga ma le maimoa, pe afai e lauga faafetai i le gagana a le atunuu se tasi o le fanauiti i luma o nisi o tino taualoa o le malo i ona tofiga maualuluga.
O le vaaiga lena sa iai i le aoga a le Te Papapa Primary i Onehunga, i le Aso Lua, aso 29 o Mati, sa faia ai sa latou sauniga faapitoa e tatala aloaia ai nisi o faailoilo fou poo sings a le aoga.
O le alii o Murray Faivalu, e 11 ona tausaga, na filifilia e le latou itupa a Samoa i le aoga, e molimolia se upu faafetai i le gagana Samoa, e fai ai o ia ma sui o le pulega ma le Komiti Faafoe a le aoga, i le susū mai ma le auai o le alii pulenuu o le Aai Tele o Aukilani, Susuga Len Brown.
O le Susuga Alf Filipaina se tasi o sui Samoa o le Pulega a Aukilani, na faaliliuina le lauga faasamoa a Murray i le alii pulenuu, ma na faaalia e molimau sa auai i lea aso le faagaeetia o le alii pulenuu i le atamai tele o lenei alo laititi o Samoa i le faatinoga o lana lauga, aemaise lava i lana gagana Samoa sa faaaogā.
O Murray o se alo faasino ia Matuaitofiga Paepae Faivalu o Toamua i Faleata, ma le faletua ia Aitalele Faivalu, mai Faleapuna ma Auala i Savaii.
O ia o le ulumatua o le fanau e toafā, ma o se alii e laititi i ona tausaga, ae ua molimauina e lē gata i le atamai i lana gagana Samoa, ae o se tamaititi e mataalia tele ma atamai i le talanoa i le va fealoai ma tagata.
O le lauga faafetai lenei a Murray:
Talofa, talofa lava.
I lo‘u ava ma lo‘u faaaloalo lava, e avea ai a‘u e fai ma fofoga taumomoli o le afioga i le tamaitai pule, ia Robyn Curry, aemaise le vasega o faiaoga, faapea foi le itupa a Samoa i totonu o le matou aoga, ou te faaleoina ai le agaga faafetai i lau afioga i le alii pulenuu o Aukilani nei, Len Brown, faapea foi lau susuga ia Alf Filipaina, ma sui uma o le Board a Aukilani nei. Faafetai tele mo le susū mai ma le tala mai o aao, ua maualuga ma matagofie ai lenei aso. Faafetai mo lo outou lagolago i la matou galuega fai i totonu o le matou aoga.
O le matou toe upu lea, ia faamanuia tele le Atua ia te outou, puipui ma leoleo le Atua ia te outou, pe a outou toe taliu atu i le maota, o loo faapea ona galulue ai, ma auauna ai mo le lelei o Aukilani nei.
Faafetai, faafetai tele lava. Soifua.
