E lē o toe nofoai le Matagaluega o Leoleo ma Falepuipui i le faia o osofaiga i nofoaga e masalomia o loo faatino ai ni gaioiga solitulafono e fesootai ma le laau faasāina o le maruana.
O le Aso Gafua na tea nei, 4 o Aperila 2011 na faatino ai foi se galuega a leoleo o le sailia lea o le fale ma le fanua o se aiga i Vailele-uta ma maua ai ni laau maruana ua ta‘i 3 i le 4 futu le uumi. Na maua ai foi ma ni lala o le laau faasāina ma ni taga pepa ua utu i ai lau ma lala mamago o le maruana.
O le molimau a se leoleo sinia, ua ese le saoasaoa o le toe aliali mai o lea solitulafono i le atunuu, ae e lē o faavaivai ai le matagaluega i le faia o sailiga. Ua iai se taulealea ua faaalia e leoleo ua taofia mo suesuega i le sailiga na faia i Vailele-uta, ma e lē o fesiligia le faaono faia o ni moliaga o lea taulealea pe a mae‘a suesuega atili o loo faia.
Ua molimauina foi le toatele o i latou ua oo atu i le faamasinoga talu mai le amataga o lenei tausaga ona o lea lava solitulafono. E oo lava foi i ni pagota se toalua o loo tuli faasalaga faafalepuipui na maua foi i le masina o Fepuari o le tausaga nei, o loo latou umia ni sikaleti maruana i totonu o le falepuipui i Tafaigata.
O le amataga o le vaiaso na tea nei, Aso Gafua 4 o Aperila 2011 na lauina ai foi se faaiuga a le faamasinoga i ni alii se toalua ma se tamaitai na maua i se sailiga a leoleo e ala i se osofaiga poo se raid. E toafā na maua i lea osofaiga e aofia ai se ulugalii talavou, o le tuagane o le fafine ma se isi taulealea.
Peitai na vave ona ioe le tamaloa ae tetee lona toalua ma isi taulelea e toalua. O le taunuuga o suesuega a le faamasinoga i molimau a leoleo na tuuina atu, na faamaonia ai moliaga o le umia o laau faasāina faasaga i le toatolu na tetee.
O pagota e toalua na maua o umia laau faasāina i totonu o le falepuipui ua toe faaopoopo nisi o masina i o la faasalaga ina ua la ioeina moliaga o le umia o le laau faasāina ma le faaulufale o le maruana i totonu o le falepuipui. Na tuusa‘o se finagalo o le faamasino le afioga Vui Clarence Nelson i alii pagota o Levi Levi ma Fiu ina ia o la logo i isi pagota latou te soli nisi tulafono a o tuli faasalaga, i le le ‘alo o le faamasinoga e faaopoopo taimi o o latou faasalaga.
O le pagota o Levi sa nafa ma le gasesega o le taeao, ae oo atu i ai Fiu ma ia ave loa i ai se tasi ma le ‘afa sikaleti maruana. I se taimi mulimuli ane na faia ai se sailiga a leoleo ma maua ai loa ma lau maruana ma le ‘afa sikaleti o le laau faasāina i le alii o Levi ma Fiu. Na faaalia e le faamasino e tatau ona sui le suafa o Fiu ia Lēfiu ona o le tele o solitulafono ua faamaonia e le faamasinoga o loo nofosala ai.
“O le sese o oe o lou pipii fua i le taulealea o Levi lea ua e lavea ai i le mataupu lenei o laau faasāina. E amanaia e le faamasinoga o lea faato‘ā molia mai oe i se mataupu faapea. E moni lava e iai isi au solitulafono ae avea mo sou lelei le tulaga lea o solitulafono na e ese le mataupu e aafia ai. E maua la se faamāmā avega ia oe ona o tulaga lena ma le tulaga lea o lea ua e ioe i le solitulafono ua sefe ai foi le taimi o le faamasinoga.
E 2 masina lou taimi faaopoopo mo le mataupu lenei”, na saunoa ai le faamasino. O Levi ua faaopoopo foi masina i lona faasalaga ma e tuli ese faasalaga ia mai faasalaga o loo nofosala ai.
