i Magele
O le faamoemoe autu a le faalapotopotoga o le Samoa Atiae, o le toe taumafai lea e tapue le aganuu a Samoa o le a mou atu, mo fanau lalovaoa o le atunuu. I le naunautaiga ma le manumanuga o tuaa matutua o loo i totonu o lenei faalapotopotoga, o le aganuu a Samoa o le measina a le atunuu, ma na o le pau foi lea o le atunuu o loo iai lana tu ma lana aganuu o loo faamemelo iai le tele o atunuu o le lalolagi ona o loo mautu ma mausali lona faavae.
Ma e le tatau la i mātua o loo iai le oa o le gagana Samoa ma le aganuu Samoa ona latou faatalale e faasoa pe tufa atu lea avei mo fanau o le atunuu o loo fai a’e. A vale tu lima i le taimi nei, o lona uiga e iai le taimi e toe fesili atu ai mātua i fanau e uiga i le aganuu a Samoa ae sau le tali ua le malamalama. O lea ala tonu lava lea na faavae ai le faalapotoptoga lea ina ia mafai ona toe tapue ma faaolaola tu ma aganuu mamalu a Samoa aemaise lava i matai fou ia ua fotuai mai i le atunuu e le malamalama.
O le ola tautua ma galuega fai i totonu o aiga o loo aoaoina ma faasoa ai foi le Samoa Atiae e ala i ana polokalame i aso taitasi, ona faasolo mai lea i totonu o nuu, faapea afioaga seia lava i le faafesagaiga i totonu o le atunuu ma le ekalesia, o vaega ia o loo mafai ona faasoa iai le polokalame a le Samoa Atiae. Ua silia i le 30 tausaga talu ona favaeina mai lenei mafutaga ma ose polokalame ua vaaia ai le faatumulia o le mamalu o le atunuu ua mafai ona auai e fia faalogologo ao faasoa tuaa sinasina i le oa o le gagana.
O le galala o tagata i le aganuu a Samoa ua taua ai le aoga o lenei polokalame i fanau lalovaoa aemaise o matai laiti o loo latou fia maua lea fesoasoani.
O le tama matua ia Vaipua Maugatai ma le susuga ia Seiuli Saua o loo avea ma faiaoga o le a polokalame. O le tele o mataupu o loo talanoaina i lenei polokalame o mataupu o loo mafai ona fetufaai ai ma faafesoaai ai finagalo ma lagona o le au faitofa o le atunuu aemaise foi oni motugaafa a faletua ma tausi ua faapaleina i suafa o aiga o loo auai uma i lenei faamoemoe.
O le taua foi o le mafutaga, o loo mafai ona mafuta fiafia ai tagata uma aemaise lava i nai tama ma tina matutua, aua o le tele o le taimi na o le nonofo lava i le fale ao lea ua iai le polokalame e o ese mai ai.
E iai fanau aoga poo tupulaga talavou ua ave i le tulafono aemaise o fanau ua sauaina e aiga, o le tasi lea taua o le pitolaau o le Samoa Atia’e, o le aumaia lea o fanau nei e mafuta faatasi ma latou i aso uma nei e tolu o le vaiaso ma sei toe taumafai a faufua ma toe fonofono lona olaga seia oo ina toe tulai mai ise suiga fou ma se isi laasaga fou o le olaga talavou.
E tolu aso o le vaiaso o loo faatinoina ai lenei polokalame mai le latou fale fono i Magele, ma e tatau ona resiatala lelei le suafa o le tagata ona avea lea ma sui auai o le Samoa Atiae. O le Samoa Atiae o loo mafai ona fesootai ma le ofisa o le Council, o le ofisa o faamasinoga, ofisa o leoleo ma le ofisa o aoga, ma ua mafai foi ona latou galulue i le isi a latou galuega fou i le taimi nei e ala lea i le galuega security i totonu o taulaga faatau.
