O le Aso Sa na tea nei sa faamanatuina ai le sefulu tausaga talu ona amataina le auaunaga a le faleaiga Samoa o le Evelina’s Polynesian Food i totonu o Aukilani. Faaalia e le tofa Vaiolo Matamua Leatioo, “O le Evelina’s Polynesian Food o le meaalofa a le Atua mo lo matou aiga. O la’u tala i le ma fanau ma le aufaigaluega a tatou lē faamaoni i le faiga o le auaunaga, e toe aveese e le Atua.”
O le atoa ai la o le sefulu tausaga, o le pinefaamau lea o le agai i luma o lenei atinae ma le tautua a se aiga Samoa o loo aifilofilo i le anoanoai o faleaiga o Saina ma Initia o loo tumu ai Aukilani i Saute.
O le suafa o le tina o le aiga poo le afioga ia Vui Evelina o loo igoa ai le faleaiga i ona lala i Clendon faapea Otara, ma o ia foi o le fatu o le auaunaga faapea le fanau ma le aiga. O le Evelina’s Polynesian Food e lē gata o le faleaiga ae iai foi lana auaunaga e tapenaina taumafa (catering) mo soo se faalavelave e iai faaipoipoga, maliu ma fiafia a aiga faapea pisinisi.
E le gata i le auaunaga i taumafa mo tagata faatau, ae e anoanoai le sao leleoa o lenei atinae i le lagolagoina o mea fai a Samoa i Niu Sila.
O le Evelina’s Polynesian Food o le tasi o lagolago autu o le Otara Community Kitchen Soup o loo tapenaina meaai mo soo se tagata o loo fia maua se meaai e pei ona iai i afiafi o Aso Gafua taitasi i le Te Puke Community Hall i Otara, aemaise o le taumafataga tele o le Kirisimasi a Otara mo aiga ma soo se tagata puapuaga. O le sefulu tausaga o le Evelina’s Polynesian Food, o le sefulu foi lea o tausaga o maua avanoa o i latou i Samoa e o mai ai faavaitaimi e galulue i Niu Sila.
O se faamanuiaga mo tupe maua aemaise o le aoaoina ai i le galue ma ola i totonu o lenei atunuu.
O le afioga Patele Fati Leota o le pule matagaluega Katoliko i Leulumoega sa faamanuiaina le atoa ai o le sefulu tausaga, a o le tofa Lofipo Ali Afakasi sa fetalai e momoli le faafetai ma le faamalo e fai ma sui o paaga ma u’o sa patipatia lea afiafi.
Faamatalaga na tuuina mai.
