O le faamanatuina o le Feast of Tabernacles i totonu o Aukilani poo le tausamiga o le faleapitaga, i le Aso Toonai ua mavae na maitauina ai le toatele o le mamalu o le atunuu o Samoa aemaise o atunuu eseese o le lalolagi o loo latou faatauaina lenei polokalame i totonu o Isaraelu. E ui lava la e leo mafai ona auai atu i totonu o Isaraelu i tausaga taitasi i le faamantuina o lenei faamoemoe taua, ae o le vaega e sili ona lelei o lea ua mafai ona faamanatuina e nisi o mafautaga a Samoa o lea o loo tatalo mo le nuu Paia o le Atua o Isaraelu, i totonu o Niu Sila ma Samoa.
I totonu lava ia o Aukilani o loo faatauaina ai e le mafutaga ua taua o le tatalo mo Isaraelu (Prayer for Israel) lenei polokalame, ona o le naunautaiga o le susuga i le taitai ma lona faletua faapea le mafutaga ia mafai ona lagona e tagata Samoa o loo tatalo mo le nuu o le Atua le taua o polokalame nei o loo faatauaina foi e Isaraelu. O le agaga moni, ua tele le saofaga o tagata o nuu ese i totonu o le faaolataga a Iesu Keriso e pei ona taua e le afioga Paia a le Atua i le tusi a Roma 11 e faapea, ua ave eseina mai le olive lelei o tagata Isaraelu ia, ae ua maua le avanoa o le olive vao e faapipiiina ai o tagata o nuu ese ia. E le mafai la ona faasiasia tagata o nuu ese i le nuu o le Atua ae e ao ona toe tatalo ma toe faamanuia tagata o nuu ese mo aiga uma o Isaraelu ae sei toe faamanuia mai le Atua i ai latou.
O le mafutaga o le tatalo mo Isaraelu o loo fefiloi ai tagata o aulotu eseese, oi latou ua ofoina lo latou soifua galulue e ala i le tatalo e tatalo ai mo Isaraelu faapea atunuu uma o le lalolagi.
Na maualuga le faauuga a le Atua na lagona e tagata eseese sa auai i lea po ao pepese le aufaipese mo viiga o le Atua e amatalia ai le faamoemoe. Na auai sui o ekalesia eseese ma faalapotopotoga aemaise nisi o susuga i faafeagaiga mai le ekalesia o le Salvationa Army, o le susuga i faafeagaiga mai le ekalesia Fiji AOG le susuga ia Pastor Eliaser ma nisi lava aulotu Samoa, sa faapea foi ona auai mai le autalavou a le ekalesia PIPC Glen Innes, autalavou a le ekalesia o le Agape International Ministry, autalavou mai le ekalesia o le Good News Assembly of God ma le mafutaga o le Walking Samoans i Papakura sa valaaulia mo a latou aitema ina ia maualuga ai le viiga o le Atua. O le susuga i le taitai le afioga ia Misa Ben Taala ma le faletua ia Maria Schmidt Taala sa faafeiloaia le mamalu o le auvalaaulia, ao le susuga i le aoao ia Nuualuga Uale sa taitaiina le viiga. O le susuga i le faafeagaiga ia Pastor Charlie Reed na manavaina le upu faauuina a le Atua, lea sa ia faamalamalaina ai le taua o le Feast of Tabernacles i totonu o Isaraelu. O Pastor Charlie Reed o se faafeagaiga o loo taitaia le tele o aumalaga a ekalesia ma aoga Tusi Paia i totonu o Isaraelu i tausaga taitasi, o le mafuaaga foi lea o le tele o lona silafia i mea o loo tutupu ma faatinoina i totonu o Isaraelu.
O le tele o aitema ma pesepesega faaleagaga i lea po mai le mafutaga tatalo mo Isaraelu ma autalavou taitasi, o feau momoli ia o le talalelei sa lagonaina e loto o tagata le taua o le tatalo mo Isaraelu ma nuu uma o le lalolagi, aemaise lava i aiga uo ma e masani o le latou taimi muamua lea ua faalogoina ai lenei polokalame, aua sa faamalamalama lelei e le susuga i le taitai ia Misa Ben Taala ma lona faletua ia Maria Schmidt Taala le taua o le mafutaga o le tatalo mo Isaraelu, e leo se tapuaiga ao le mafutaga ua tutu faatasi ai tagata taitoatasi e tatalo mo le nuu o le Atua.
Na taualuga le faamoemoe o lea po i le taumafataga ma faaauau ai le felosipi o tagata uma i le lelei ma le matagofie o le Atua.
