Reunion aiga Nanai Tavalu Tauena ma Mela

Reunion aiga Nanai Tavalu Tauena ma Mela

O le vaiaso o le Labour weekend sa faataunuuina ai le family reunion o aiga ma i latou uma na tupuga mai i le afioga ia Nanai Tavalu Tauena ma le tina ia Mele i Matautu ma Pata i Falelatai ma Siumu. Sa matua faatumulia le nofoaga i Manukau i le hall a le ekalesia PIPC sa api uma ai aiga na faigamalaga mamao mai Amerika, Ausetalia, Samoa, Ueligitone ma Aukilani Niu Sila nei ona o lenei faamoemoe.

Na amataina lenei reunion mai le aso faraile 19 o oketopa 2018 e ala i le sauniga lotu amata na taitaia e le susuga i le Epikopo ia Nanai Poulalo, ma faasolo ai le polokalame i le taeao o le aso na sosoo ai le aso Toonai, i lotu o le taeao na taitaiina e le susuga i le faafeagaiga ia Pastor Mataia Samuelu Lealaiaulotu Nofoaiga.

O faafiafiaga faaleagaga ma faafiafiaga faaonapo nei ma taaloga na saunia lea e faletama taitasi. E toa sefulu tasi le fanau a Nanai Tavalu Tauena ma le tina ia Mele.

Ua tupu ma ola manuia lenei aiga, e le gata o le toatele o le aiga ma fanau, ae o le toatele foi o ana lupe faalele na tupuga mai i le toeaina ma le loomatua, lea ua galulue i fata faitaulaga eseese aua le finagalo o le Atua. O le tala faasolopito o le teoaina ia Nanai Tavalu Tauena ma Mele, ona o le laua taulaga ofoina mo le galuega a le Atua, na laua ofoina ai le fanua e igoa o Utumoa lea o loo tu ai le malumalu tapuai o le EFKS i Matautu Falelatai. O le isi taulaga na laua faia o le ofoina atu foi lea o le isi fanua e fai ai le galuega a le Atua lea o loo faatuina ai le EFKS i Saaga Siumu. Ona e talu ai o Nanai Tavalu Tauena na tupuga mai ia Tauena Levi ma le loomatua e igoa ia Leitu i Saaga Siumu.

Nisi o tina matutua i totonu o le aiga faapea ana lupe faalele

Nisi o tina matutua i totonu o le aiga faapea ana lupe faalele

O le tapauaiga i le aso Sa, sa leai se isi na lotu ese, ae na lolotu faatasi uma tagata i le sauniga lea sa faatunuuina lava i le hall i Manukau i le nofoaga sa api ai le aiga. O le taitai o le sauniga ma le laugaina o le upu faauuina a le Atua o le susuga i le faifeau faiaoga mai le kolisi faafaifeau i Malua ia Rev Dr Vaitusi Lealaiauloto Nofoaiga, o se tasi o lupe faalele, na tupuga mai i le toeaina lenei ma le loomatua.  Na faaiuina le faamoemoe o le aiga i le aso Gafua i le faamanatuina o le 91 tausaga o le tina ia Tafito o le toe tagata lea o le aiga o loo totoe mai i le taimi nei.

O le susuga i le faafeagaiga ia Pastor Aperaamo Lotovale Nanai Tuugasala o se tasi foi o taulaga soifua a le aiga, na taitaia le sauniga o le aso soifua o le tina. O Pastor Aperaamo o le toeaina o le matagaluega Samoan Assembly of God i Ausetalia, o ia foi lea na saunoa i le faaiuina o le reunion a le aiga. O le sini autu o lenei mafutaga faaleaiga e faapea, One Heart – One Love – One Family.

O nisi o susuga i faafeagaiga o le aiga na mafai ona auai mai i lenei faamoemoe, o Pastor Aperaamo Lotovale Nanai Tuugasala ma le faletua, Rev Dr Vaitusi Lealaiauloto Nofoaiga, susuga i le Epikopo ia Nanai Poulalo ma Lagi, o Pastor Mataia Samuelu Lealaiauloto Nofoaiga ma le faletua ia Vaisulu faapea le susuga i le faafeagaiga ia Rev Sonny Meleisea ma le faletua ia Faaa’e.

O le toatele foi o nisi o faifeau na tupuga mai i le toeaina ma le loomatua, na le mafai ona auai mai ona ua le maua se avanoa. Na tapenaina lenei faamoemoe e suli o Nanai Tavalu Tauena ma le tina ia Mele i Aukilani Niu Sila, ma le faamoemoe maualuga o le aiga e toe faaauauina lenei faatasiga i le tausaga 2020 i Sini Ausetalia i le alofa ma le agalelei o le Atua.