Ua teena e le Peresitene o le Sosaiete a Loia i Samoa le afioga Leota Raymond Schuster, faamatalaga ma lipoti i nusipepa ma leitio i Samoa ua ta‘ua ai le faia o ni moliaga faasaga i se tasi o alii loia sinia o se sui foi o le sosaiete, le susuga Toleafoa Solomona Toailoa. Faaalia e le Peresitene o le sosaiete, e leai se mataupu faapea ua oo atu i le laulau o faatonu poo le council a le latou faalapotopotoga.
O sailiga i le fia maua o se finagalo o le alii loia e lei manuia peitai na fesiligia e le failautusi o le sosaiete, le tamaitai loia o Rosella Papalii Viane ma ia faailoa mai ai, e leai ni moliaga ua faia.
“E matuā sese lava na lipoti ua faasalalau”. Na ia faailoa mai foi o soo se mataupu e oo atu i le komiti o amioga le disciplinary committee a le sosaiete e iloilo muamua e latou ma faia ai se suesuega, ma maua ai le faaiuga pe faia ni moliaga e tusa ma taiala o tulafono faaloia faasaga i se sui o le sosaiete, pe leai foi ni moliaga.
E faato‘ā mafai ona faasalalau lautele se faaiuga i ni moliaga ua faia faasaga i se sui o le sosaiete e pei ona faamalamalama mai e le failautusi, pe a oo ina suesueina se tuuaiga i le faamasinoga faapitoa poo le Tribunal a Loia.
O le masina o Ianuari o le tausaga fou o le a toe tauaofia ai le faamasinoga faapitoa a le sosaiete a loia mo le tuuina atu o folasaga ma finauga faaiu i moliaga e lua o loo molia ai le tamaitai loia, le afioga Leuluaialii Olinda Woodroffe.
Talu ai nei foi na faia ai le faaiuga a le faamasinoga faapitoa a loia e faasala mo le lua tausaga se isi sui o le sosaiete e lē mafai ona toe galue faaloia, ina ua faamaonia ni moliaga se lua o lona faia o ni gaioiga ua lē talafeagai ma taiala ma tulafono o le galuega.
O le sosaiete a loia i Samoa e iai ana taiala ma tulafono e puipuia ai le faatinoga o galuega faaloia ina ia tausia ai le mamalu ma le faaaloalogia aemaise le talitonuina e tagata lautele o le galuega.
O ni taiala foi e tuliloa ai le faia o tiute ma le faamaoni. O taiala ia ma tulafono e mafai ona faasalaina ai se sui o le sosaiete pe a faamaonia ua na solia, ma e mafai foi ona oo le malosi o ia faasalaga i le soloia ma aveesea ai ni tofiga loia o se sui o le sosaiete e fua i le matuia ma le ogaoga o se tuuaiga.
