Ua faatea e le Ofisa o Leoleo se alii sa galue o se Malu o le Malo ona o le faamaonia o lona faasalaga o le gaoi.
O lea tagi na tulai mai i le Maota na pou ai lenei alii pe sa tiute ai foi. O le tasi o Maota o le Malo e tiute ai Leoleo i po, o le Maota lea o le Ao o le Malo, lea o loo faaaogā faaofisa. O lea Maota e i autafa o le Ofisa o le SUNGO i Motootua.
O le lipoti a Leoleo o loo ta‘ua ai o Aumau Hunt sa tiute i le Maota lea o le Malo i se taimi o le tausaga nei, ma o inā na lipotia mai ai le gaoia o se masini ipod mai lea Ofisa.
E tusa le tau o lea meatotino ma le $700 (tala Samoa).
Na tele masina o suesue poo ai ua gaoi mai i le Ofisa o le Ao o le Malo, ae na matuā teena lava e lenei alii tuuaiga ua amata ona faasagasaga atu ia te ia.
O suesuega a Leoleo na maua ai e leai lava ni tagata e o atu fua i le Ofisa i le Po ma e lē o iai foi ni tuufaatasiga poo ni mafutaga faitele na faia i lea Maota.
Ona pau tagata e masalomia i le ave faagaoi ai o le ipod o tagata faigaluega o le Ofisa o le Ao o le Malo, ma leoleo ia e tiute ai i le Maota.
Na mae‘a suesuega ma iu ai lava ina ioe lenei alii i lea moliaga faapea na alu i totonu o le Maota ma aumai ai le ipod.
O le lagona faanoanoa o le Faamasinoga e pei ona faaleo i le lauina o le iuga o le alii o Aumau Hunt, ona o le galuega ma le tofiga o le Malu o le Malo poo le Leoleo, e ave i ai le faatuatuaga o tagata uma.
O le tulai mai la o soligatulafono faapenei ua faia e i latou ua ave i ai le faatuatuaga lea, ua matuā faaleaga ai le Matagaluega o Leoleo ma ana auaunaga ma ua ta‘uvalea ai lava le galuega ona o le gaioiga a lenei alii. O le isi itu ua atili leaga ai lea tulaga, ona e tupu le solitulafono o loo tiute lenei alii o se leoleo.
O le sala o lenei alii e totogi le $900 (tala Samoa) pe nofo i le toese i Tafaigata mo masina e tolu.
O le vaiaso na tea nei na laga ai le toatele o loia ua aafia i faiga faasolitulafono ma o loo iai nisi o loo faagasolo lava foi o latou faamasinoga. Ae o le tausaga ese foi lenei i le toatele o Leoleo ua molia i luma o le Faamasinoga.
O nisi ua tuli faasalaga faafalepuipui ae o loo faagasolo lava foi mataupu faasaga i le isi toatele i le taimi nei.
O le faamatalaga a le Komesina o Leoleo, o lea ua faamaonia le solitulafono a le alii Leoleo lea ua ta‘ua le suafa, ma e leai lava se isi faaiuga e faia ia i latou o loo galulue i le Matagaluega o Leoleo ae faamaonia a latou solitulafono se‘i vaganā ai lava le faatea ma lana galuega “Talai le togiga”.
O se faiga lea ua masani ai lava i latou o loo galulue faaleoleo e pei ona faamautu mai e le alii Komesina o Leoleo.
O ai lava e faamaonia le faia o se solitulafono, o le a faaauau moliaga ma faasalaga faaletulafono ae o le a faasala foi e lē toe galue i le Ofisa o Leoleo.
O loo faaauau foi lava suesuega o se Leoleo Sinia i le taimi nei, ma o le iuga foi lea pe a faamaonia moliaga ua faia faasaga ia te ia.
O le tasi o Komesina Lagolago o Leoleo na faapea foi ona faatea ma lana galuega ina ua tuuaia lona faia o ni uiga matagā.
E lei mautu la se iuga o lea tagi, ae ua leva ona faamālōlō i le taimi nei mai le faatautaiga o ona tiute faaleoleo.
