E lei faigofie le taaloga o faaaliga o mafaufauga ma le atamai tau i le tulafono, i le va o le alii loia o Simativa Perese, ma le tamaitai loia, le afioga ia Leuluaialii Olinda Woodroffe.
O se finauga e lei faataetaealuga ae sa matuā vavane, ma alia‘e ai le aano moni o le tulafono atoa ai ma lona faaaogāina i totonu o ekalesia ma lotu.
E fa aso sa faagasolo ai le faamasinoga i le Faamasinoga Maualuga i Aukilani, i le va o itu e lua o le ekalesia EFKS i Westmere. O le susuga i le alii loia Simativa sa tulai mo le itu a le faifeau o loo iai nei, Rev Vagatai Vaaelua, a o le afioga ia Leuluaialii Olinda, o le loia a le isi itu lea sa tulai ese mai le ekalesia.
O le mae‘a ai o aso fa, Aso Gafua aso 29 o Novema seia oo i le Aso Tofi, aso 2 o Tesema talu ona finauina le mataupu e loia i luma o le faamasinoga, ua toe moe ai nei le toa ma toe taoto ai i le laulau a le faamasino le mataupu seia iai se aso o le a fofogaina ai se faaiuga talafeagai.
Sa manatu le toatele o le a maua lava ma tolaulauina se faaiuga i le mae‘a ai o folasaga faaiu a loia, peitai e lē o lea le silasila ma le tagai a le faamasinoga e tusa ai ma le mataupu.
Na faaalia e le tamaitai Faamasino, e lē mafai ona vave faia se faaiuga, ona o se mataupu e matuā faigata tele ma e lē faigofie foi le iloiloina o se faaiuga tatau e faia i ai.
O le ala lea ua manatu ai le faamasinoga, ina ia taoto atu le mataupu se‘i toe sailiili ma faatoatoa lelei itu uma sa agai i ai folasaga a loia, ona fuafua ai loa lea i ai o se faaiuga talafeagai, ma toe fofogaina ai itu o le faamasinoga.
A o tālia ai nei se faaiuga o le a toe fofogaina ai itu e lua i se taimi o muamua, peitai e matuā telē se tāua ma se a‘oa‘oga aogā ina ua faafofoga ma le toto‘a ma le manino i folasaga a loia.
E lē gata i le aufaigaluega a le Atua, ae faapea foi tagata lotu ua ta‘ua o le ekalesia.
E mautinoa foi le penefiti uma o tagata i le va ma le tulafono, ona o le galuega a loia sa taumafai i ai mo le manino o lea foi ituaiga mataupu.
E ui lava foi la i felafolafoaiga ma finauga a loia e toalua sa taiulu i le mataupu, peitai o le maitau i ai, o le a fuafua se faaiuga a le faamasinoga agai i le faaliliuina ma le auiliiliina e loia o le aano ma le uiga moni o le tulafono a Niu Sila.
E atamamai loia, peitai o le maitau i mataupu faapea, o le a avea o se lesona aogā tele mo soo se tasi lava i totonu o Niu Sila, talu ai e ese a Samoa, i auala o loo faavae ai lotu i afioaga ma nuu, ese foi tulafono mo le faagaioiga o lotu i Niu Sila ma atunuu i fafo.
A o faagsolo ai le faamasinoga i lona aso muamua ma le aso lona lua, a o le Aso Lulu o le aso lona tolu lea, sa toe tuu avanoa ai le faamasinoga mo itu e lua ina ia toe fetāla‘i le tofa ma le faautautaga.
O se avanoa sa toe tuuina e toe sasaa ai le fafao, ma toe maua se feiloaiga a itu e lua, ma le manatu o le a toe fofo alamea ai le mataupu ma toe faafoi ese mai ai i le tagofia e le faamasinoga mo se faaiuga.
Sa tuumuli le faamasinoga mo se taimi umi, ae tuu le avanoa e toe fetufaa‘i ai itu e lua, peitai e lei maua se tasi, e lei mafai foi ona toe tuufaatasia finagalo o le ekalesia. Sa toe fofogaina le faamasinoga ina ia faaauauina pea le galuega faafaamasino e sailia ai se filemu ma le mea moni.
O se faamasinoga uigaese le tumu, sa oo ina toe la‘u atu nofoa i totonu o le potu faamasino, atoa ai ma le faatagaina ona faaaogā le isi itu o laulau a faatonu ona o le toatele o le mamalu sa auai ma tapuaia le faamoemoe.
E latalata i le fa selau i latou e lē gata i aiga lotu o le ekalesia i Westmere, ae faapea foi uo ma aiga sa naunau atu e fia molimauina le taunuuga o le mataupu ona ua vaeseuga o moea i le tulafono.
O le mataupu a le ekalesia EFKS i Westmere i Aukilani Tutotonu, ua fa nei tausaga o va pea le fogavaa i finagalo o tamalii ma le mamalu o le ekalesia.
O le fa ai foi lea o tausaga o taoto ai pea e lei toe maua i ai se tasi, ina ua tulai mai se faafitauli ma na faitau eseese ai loa Tutuila ma Ape, e pei o upu a le atunuu.
O le aso lava lea o le faamasinoga sa maua ai le avanoa o le Samoa Times, e talanoa ai ma fesiligia tamalii ma failauga aemaise o le mamalu o itu e lua o le faamasinoga, ma o itu lava foi ia e lua e pei ona vavae i ai le ekalesia talu ona tulai mai le faafitauli.
E lē gata i lea, ae sa maua foi ma le avanoa i le aso lava lea i le fale faamasino i Aukilani, ina ua mālōlō le faamasinoga, e talanoa ai i le susuga i le taitaifono o le fono a toeaina o le ekalesia aoao a le EFKS, o ia foi o le taitaifono a toeaiina o le matagluega a Niu Sila, Rev Ioritana Tanielu.
Feiloaiga ma le toeaina, Rev Ioritana Tanielu
E fai si umi o fefaasoaa‘i pea ma le toeaina i le tulaga tonu sa agai i ai la latou faaiuga sa faia i le taimi muamua sa tulai mai ai le faafitauli.
E lē gata i lea, a o le tele foi o isi mataupu sa aafia ai le tele o aulotu ma sa tau lilifa ai le lē fiafia o nisi agai i le fono a toeaiina.
O nisi lava sa faaalia o latou lagona, ma fesiligia ai le amiotonu o faaiuga fai, ma le faaaogāina o le malosi faatoeaiina e faia ai faaiuga.
O le faaiuga foi a le fono a toeaiina sa faia i le mataupu lava a Westmere, sa faavae i se suesuega na faia faasaga i le faifeau. Sa tu foi le faaiuga i lo latou talitonuga o le faaiuga talafeagai lea, ma o le a toe faafoi ai le ekalesia i le filemu.
Sa lē o lea le faamoemoe, ma ua oo lava ina tulai ese le isi vaega ona e tumau pea lo latou talitonuga ua sese le faifeau.
E ui i lea tusa lava pe o ese tagata ma le lotu, e tuuavanoa pea le ekalesia ma faia le galuega o le taumafai e faamaopoopo mai le lafu mamoe.
O le oo o le mataupu i le faamasinoga e lē mafai la ona toe fai i ai se faamatalaga auā o le aiā tatau lea a le tagata lava latou ia e faaleo ai ona lagona, ma lona lava sao ma le mautinoa. Sa manino foi le saunoaga a le toeaina i auala e fai agai i ai a latou faaiuga, ona o le tele o taimi e tuuaia lava toeaiina ona o faaiugafai i mataupu e tutupu mai.
E lē gata i le mataupu a Westmere, ae faapea foi le tele o isi aulotu ma a latou faifeau. E limataitaiina lava la faaiuga a toeaiina i taiala ma faiga faavae a le ekalesia, e leai se faaituau pe faapitotasi. E ao ina manatua e tagata lotu, o latou o ni auauna e faataunuuina faiga ma faavae o le ekalesia aoao ua mae‘a ona faataoto e augatama ma ta‘ita‘i ua mavae.
Leuluaialii Olinda Woodroffe/Simativa Perese
Sa faapea lava foi ona feiloai atu i loia e toalua le susuga ia Simativa ma le afioga ia Leuluaialii, e lē gata o se faamalo i ai mo le galuega, ae sa taumafai foi e fesiligia e tusa ai ma le mataupu, aemaise o se ataata mai o se faaiuga a le faamasinoga e ono faia.
Peitai e ui i lea sa lei mafai ona aumai ma fia talanoa loia e toalua, talu ai ona o tulaga ma puipuiga lava o le galuega ma aso faapea. Sa taliaina foi ma le agaga fiafia ma le faaaloalo tele e tatau ai, ona o le amanaia o tulaga faaloia ma galuega tau faamasinoga.
Itu Tagi ma le Itu Tetee/Ekalesia Westmere
E ui o loo va pea le fogavaa, ma ua fa tausaga e lei maua pea se tasi, ma ua oo lava foi le mataupu i le tulafono e pei ona iai lea aso, ae o se tulaga matagofie sa maitauina ma molimauina i lea aso ina ua feiloai atu i itu e lua o le faamasinoga, o le maua o le filemu mai le Atua.
Sa faaalia e tagata uma le agaga o le toafimalie ma le toafilemu e ui ina vevela ma oo folasaga a loia ma oia ai faavae o le lotu ma le ekalesia aoao, peitai sa maitauina le to‘a pea o le tai i tamalii ma le mamalu o le ekalesia i ona vaega e lua.
E ui lava ina lei maua se tasi ina ua toe tuuavanoa le faamasinoga i le aso lona tolu o le faamoemoe, peitai sa ese lagona o lea aso ona o le tofa faatamalii ma le utaga faafaleupolu atoa ai ma le tofa faale-Atua, sa mātau i ai finagalo ma manatu o le toatele.
E leai se mea na gasē, e oo lava i sina faamatalaga lafo, sa leai lea ae sa faamaonia ia tulaga uma i uiga tausaafia ma fofoga fiafia o tagata uma.
O se ata e atagia ai le naunau o itu e lua ina ia toe maua se isi mafutaga mo le lumanai, peitai ua iai le ila ma ua pona foi lea mafutaga, la lea ua sulufai ai mo se fesoasoani.
E ui ina malosi pea le finau a le itu tagi e teena ai le faifeau ona o le faaletonu sa tulai mai i le tulaga tau seleni, ae o loo piiama pea foi le isi itu, ona o le puipui i le faifeau ma le galuega. Peitai faato‘ā mafai ona maua se tali filemu ma le sa‘o o ia finauga, pe a lau ma aumai le faaiuga a le faamasinoga i le aso ua fuafuaina.
Talu ai e lē o se taimi muamua lenei ua faafofoga ai le atunuu i le mataupu a Westmere, ua manatu ai o le a lē toe auiliilia vaega taitasi o le finauga, ne‘i avea o se faaolaola i se manu‘a ua amata o pe ma mate.
O le a lē toe sagolegole foi le galuega nei, ae se‘i tālia poo fea se aso ma le taimi o le a tali mai ai le faamasinoga, ma ia talosia o se faaiuga e maua i ai se to‘a ma se fofō o le gasegase o le aulotu, aemaise lava o le ekalesia aoao.
