O le laugatogi a le Strive Community Trust i le taeao o le Aso Faraile ua tea sa ou maua ai le avanoa e momoli ai le faamalo ma le faafetai i nisi o tupulaga talavou faapea foi mātua sa maua latou faailoga mai ni polokalame tau a‘oa‘oga sa auai i le tausaga ua tea.
E leai lava se isi mataupu e pito i sili ona tāua i le tatou Atunuu mo le agai i luma, se‘i vaganā ai a‘oa‘oga ina ia maua le poto, maua le tomai, maua faailoga maualuluga, auā le sailiga o galuega e maua ai ni totogi lelei mo le tausiga o aiga. E oo foi ia i latou o loo faia pisinisi, o se tulaga tāua tele lava le saili o le poto ma le malamalama i mataupu e faataunuu ai le pisinisi i se tulaga manuia.
Ou te talitonu lava a‘u ia, afai e lē maua e tupulaga talavou o loo fai mai le avanoa e oo ai a latou taumafaiga i a‘oa‘oga maualuluga e pei o le univesite, poo aoga foi o mātātā eseese, afai e lē saili i ai ma finau ia maua le tomai, ua faatamala tele, ma e lē maua e latou se lumanai manuia, ma ou te talitonu e na o le pologa o le a oo ia i latou.
E lē gata foi i le maua o le poto ma le atamai mai aoga maualuga, ae ao foi ona maua e tupulaga talavou a‘oa‘oga mai totonu o aiga i le va feagai ai ma tagata lautele, ia mata‘u i le Atua, ia silafia le tāua o le usitai ma le faaaloalo i mātua, ia malamalama i talafaasolopito o lona aiga, ma ia malamalama i le tāua o le gagana. Afai e lē iloa e le tamaititi le gagana Samoa, o le a faapena foi ona lē iloa e le tamaititi le tāua o tu ma aga mamalu o le faa-Samoa. O tu ma aganuu mamalu o Samoa, e lē o toe faigofie ona tausi i aiga i Niu Sila nei. O le toatele lava o tatou aiga ua faaaogā lava le gagana faigofie a papalagi ma ua atili ai lava ona faigata i tupulaga talavou ona taofi mau le gagana.
O se luitau lea mo le tatou atunuu, o le taofi mau o le gagana, tu ma aga mamalu a Samoa mo le agai i luma. Sa matuā lagona foi le agaga fiafia ma le agaga faagaeetia i le matagofie ma le logo
mālie o pesepesega o le Kerisimasi sa faia e le aufaipese tuufaatasi a le Ekalesia a Iesu Keriso o le Au Paia o Aso e Gata Ai, le Ekalesia Faapotopotoga Kerisiano Samoa mai Magele ma Sandringham faapea le Ekalesia Greyfriars Presbyterian Church i le Aso Faraile ua tea i le Auckland Town Hall.
O lenei aufaipese sa taitaia e le susuga i le faafeagaiga Rev Ron Lau‘ese ma tamaitai o Ivoga Green ma Niu Taala. Ua sefulutolu tausaga o loo faia lenei faamoemoe i le Auckland Town Hall ma o se tulaga ofoofogia i tagata papalagi sa faafofoga i pesepesega ona e lē gata o le logo mālie o siufofoga a le aufaipese tuufaatasi, a o pese sa latou pepese ai o pese na fatu lava e le susuga i le faafeagaiga o Ron Lau‘ese ma pese sa fatu foi e tamaitai Lotu Mamona o Ivoga Green ma Niu Taala.
E lē gata i lea, o le isi itu e pito i sili ona tāua ai pese sa pepese ai lenei aufaipese tuufaatasi, ona sa pepese faatasi ma le faili o le ‘Auckland Symphony Orchestra’.
Mo le silafia e le tatou Atunuu, e lē masani ona alu atu fua se tagata ese ona fai lea ma ta‘ita‘i ma fuataimi o le faili lauiloa lenei o le ‘Auckland Symphony Orchestra’. I ala masani lava o faili faapenei, e lē o se tulaga e masani ona tupu. Peitai ane, sa maitauina e le aumaimoa i lea po le tuua o le avanoa e le alii o Gary Daverne, ONZM, lē e ta‘ita‘i ma fuataimi o le faili o le ‘Auckland Symphony Orchestra’, i le faafeagaiga o Ron Lau‘ese ma le tamaitai o Niu Taala, e
fuataimi ma taitaia le faili o le ‘Auckland Symphony Orchestra’ i pese na tusi ma fatu lava e laua mo lea faamoemoe.
E maofa papalagi sa iai, ona e lē gata i le logomālie o siufofoga o le aufaipese tuufaatasi, ae o le toatele o le aufaipese o tagata Polenisia, ma o le toatele lava o Samoa.
O le isi itu na pito i sili ona maualuga ai lenei po, ona na taualuga i le pese toatasi a le susuga Rev Ron Lau‘ese.
Sa ou lagona ai lava le mitamita i lo‘u agaga ona o lo‘u faalogo i lea po, i le fiafia o papalagi sa iai faapea le tatou atunuu, e lē gata i le manaia o pesepesega, a o le talenia o i latou nei sa taitaia lea faamoemoe, aemaise le susuga ia Rev Ron Lau‘ese, faapea foi Ivoga Green ma Niu Taala.
O se tasi lenei o pine maualuga ou te taofi ai lava e ese le maoa‘e o meaalofa a le Atua ua foai mai i o tatou tagata. Ou te manatua ai se tasi o aso na tu mai ai se taavale i lo‘u fale. Ou te lē iloa
lenei aiga. Na nanu mai e fia faanoi pe mafai ona tau ni tipolo mai la‘u tipolo o loo tu i tua o le matou fale. Ou te lē iloa pe na faapefea ona latou silafia o loo iai se matou tipolo. O‘u fai atu lava lea i ai ua lelei e o e tau, ae tau fuafua. O lenei lava matou te fenanui. Ou te alu i totonu o le fale e sauni mo a‘u fonotaga, ae ou faalogo mai ua faa-Samoa le fafine i le tamaloa, “vave tope le tau, ae tatou o.”
Ua ese lava o‘u lagona na oo mai i lena taimi. Poo le ā le mea ua te‘i ai fua ua o mai e faanoi tipolo ae matou te lē masani. O‘u sau lava lea i fafo o‘u nanu atu i ai ua lava lena o a‘u ua ou tuai i a‘u fonotaga.
O lenei tipolo e ese le ola ma e fua lava i masina uma. E faapena foi lenei olaga. O loo ia i tatou taleni na faameaalofa mai e le Atua. E pule lava le tagata pe faaaogā ia taleni e pei o le fua lelei o la‘u tipolo, e pei o le faafeagaiga o Rev Ron Lau‘ese, poo tamaitai o Niu Taala ma Ivoga Green.
Afai tatou te lē saili ma faaaogā taleni ua faameaalofa mai e le Atua mo tatou, ou te talitonu e leai se manuia e maua ai.
