O le faatuina o le faalapotopotoga o le Toomaga mo Tagata Puapuagatia i Samoa (Samoa Victim Support Group) ma faagasolo ana polokalame faalauiloa i le autū o lana auaunaga ua avea ma faitotoa e malamalama ai le toatele ma faailoa atu i le faalapotopotoga mafatiaga o feagai ma i latou, aemaise sauāga tau feusuaiga e aafia ai tina ma tamaitai faapea fanau.
“O le autū lena o le tautua a le Toomaga, ma ua faaosofia ai lagona o le toatele e aua ne‘i toe natia ni mea leaga e faia ia i latou e isi tagata”.
O le finagalo lea o le alii Minisita o ia o le Faatamā, le afioga Tuisugaletaua Sofara Aveau, i se feiloaiga ma tusitala e faailoa ai le faamanatuina o le lima tausaga o galuega a le faalapotopotoga.
O le Aso Faraile, 26 Novema 2010 na faatino ai e le Toomaga se polokalame e amanaia ai le lagolago a le toatele i le latou tautua, ma faamanatu ai foi le atoaga o le lima tausaga talu ona faavaeina.
“Ua faatupulaia pea mataupu i sauāga tau feusuaiga e aafia ai tina ma fanau teine e faaoo mai, ma o le matou talitonuga, ua iai le avanoa lenei mo tagata e sulufai mai ai mo se fesoasoani”, saunoa ai le Peresitene o Lina Chnag.
O le finagalo foi o le Peresitene na ia faailoa ai e faapea o le tausaga lava ia na tea nei e silia i le 400 mataupu na faato‘ai atu, ma e fulisia lava i mataupu tau sauāga e aafia ai tina ma fanau teine.
O ia mataupu sa tuuina atu e le Toomaga i leoleo mo le faia o ni suesuega ma molia ai nisi o loo falepuipui nei ina ua faamaonia o latou moliaga.
Na faaalia e le faatamā e lē o mataupu uma e oo i le tulafono, auā o nisi tagata e manao i se fesoasoani e fofo ai se faaletonu ua aafia ai.
“Ioe e lē o matou e faia le galuega o le suesueina o mataupu ma ave i le faamasinoga, o le galuega lena a leoleo. Ma o se sootaga mafanafana o loo vaavaalua ai le Matagaluega o Leoleo ma matou”, o le isi lea finagalo o Tuisugaletaua Sofara ina ua fesiligia.
O le tausaga nei na faia ai se polokalame e le Toomaga mo le tafiesea o solitulafono o le toso teine ma le faaoolima matagā lea sa faasolo ai a latou polokalame i nuu ma afioaga uma i Upolu ma Savaii.
O se polokalame ua talitonu le Toomaga mo Tagata Puapuagatia ua maua atili ai e le atunuu se silafia i le tāua o le latou faailoa atu o ni mea leaga e aafia ai, aemaise lava o sauāga tau feusuaiga.
