Tamaitai faipule o Alataua i Sisifo, Aliimalemanu Alofa Tuuau

Tamaitai faipule o Alataua i Sisifo, Aliimalemanu Alofa Tuuau

Na manino lelei le tetee o le faipule o le maota o le Palemene, o ia foi o le sui faipule mai i le itumalo faaalalafaga o Alataua i Sisifo, Aliimalemanu Alofa Tuuau, ina ua fesiligia i sona taofi e faapea, na te lagolagoina le mau a le SSIG, ia aveese le tulafono o fanua faaleaganuu o le 2008.

O faamatalaga mai i le peresetene o le SSIG, na ioeina e le sui faipule, e sa’o lo latou mau o loo finauina, e pei ona faaalia e le sui faipule ina ua feiloai sui o le SSIG ma sui o lona itumalo faaalalafaga i le faaiuga o le vaiaso talu ai.

O le feiloaiga lea na faia i Asau, o le polokalame masani a le SSIG ua faaigoaina i le gagana peretania, o le Village Education Unit – VEU. O le polokalame lea a le SSIG e agai ai i tua i nuu ma afioaga e faamalamalama iai le mafuaaga ua ala ai ona o latou finauina le toe aveesea o le tulafono o le lesitalaga o Fanua Faaleaganuu i le atunuu 2008.

Fai mai le peresetene o le SSIG Afamasaga Tasolo, na auai ai le tamaitai faipule o le itumalo faalalafaga, ma ia ioeina ai e sese le tulafono o le Lesitalaga o Fanua Faaleaganuu 2008 ma e na te lagolagoina le mau a le latou faalapotopotoga (SSIG).

Peitai, na tetee mai e le sui faipule ina ua fesiligia.

O le tali a le faipule e matuā leai ma sana faamatalaga na fai e na te lagolagoina ai le mau a le SSIG, ma e “sese ma lē sa’o” faamatalaga ua feaveai e le SSIG.

“Leai e sese, ou te lē kea foi a’u i faamatalaga ua fai, auā o loo molimau lo’u itumalo e leai sa’u faamatalaga faapena na fai.”

Saunoa Aliimalemanu, e pau le tulaga o loo silafia e le latou nuu, o lona taumafai lea e faasa’o tala’iga sese ua faia e le SSIG, e faaseseina ai lona nuu.

“Na ou fia faasa’o iai e sese le latou mau, auā ua o atu nei, ma fai a latou faasalalauga sese, i tagata o lo’u nuu fai mai, ua faaaogā e le malo fanua faaleaganuu e faamau ai nonoga tupe a le malo.”

“E matuā sese i sini ia faamatalaga e lē sa’o e leai se mea faapea o tupu, ma e lē o faaaogāina e le malo, fanua tau Samoa e faamau ai ni nonogatupe, o faamatalaga e taitaiseseina ai tagata o le atunuu.”

Saunoa foi Aliimalemanu o loo manino i lalo o le tulafono 102 o le faavae, e lē mafai ona mokesi fanua faaleaganuu, pau le tulaga o loo manino e mafai ona lisi, ae lē mafai ona mokesi ai ni nonoga tupe.

“E matuā sese lea mau ua fai mai ua ou lagolagoina le latou mau.”

Fai mai le suifaipule o ia e na te lei iloaina sea feiloaiga, peitai, na ala ona alu agai iai, ona ua taunuu atu le faamatalaga ia te ia, e iai nisi o sui o le malo, o le a feiloai ma lona sui i se mafutaga faasemina.

“O a’u ua ou te’i, auā ou te lē iloa se mea, ae e tatau ona ou iloa pe afai o nisi mai le malo, ona ou soona alu lea iai, ae ou taunuu atu o le faalapotopotoga lea.”

“Ona ou nofo ai lea se’i ou faalogologo poo le ā tonu le feau lea, ae aumaia le feau ou faalogo atu, e matuā sese le mea na agai iai.” “Na faafofoga lava iai lo’u itumalo, aemaise sui o lo’u nuu ae ou fai sa’o iai i le sese o latou faamatalaga, ua taitaiseseina ai sui o le matou nuu.”

Saunoa le faipule e tatau i le mamalu o le atunuu, ona malamalama lelei i le faavae, e lē faatagaina ona mokesi ni fanua faaleaganuu.

Faaalia e le faipule, afai ae tupu se mea faapena se’i vagana ua ausia le 2/3 o le Palemene ona fai lea o se pelepesite e aumai ai finagalo o le atunuu ae lē faapea, a fia fai loa le mokesi otomeki le faatinoga.

Peitai o loo tamau le saunoaga a le peresetene o le SSIG, na fai le saunoaga a le sui faipule ma o loo iai a latou faamaumauga i le saunoaga a le faipule na fai i lena feiloaiga.