Fiame Naomi Mataafa

Fiame Naomi Mataafa

Na tulaga ese le faauuga a le Iuniveste o le Pasefika i Alafua i le faaiuga o le vaiaso na tea nei, pe a faatusa i isi faauuga o isi tausaga ua mavae.

O le tausaga lenei, na faaee ai e le Iuniveste Aoao o le Pasefika i Saute – USP le faailoga o le fomai, poo le faaperetania o le Honorary Doctor i le Sui Palemia, le afioga Fiame Naomi Mataafa, e aloaia ai lana tautua matavela i le atunuu, ae faapea ai ma le Pasefika i Saute.

O se faailoga o loo atagia ai le tele o le tomai ma le agavaa o le Sui Palemia, i soo se vaega o lana tautua, ma lana faiga malaga i ona tofiga faaupufai, atinae tau aoaoga, aemaise o lona taulamua i puipuiga o le siosiomaga mai i uiga fesuisuiai o le tau.

E lē gata i lea o le silasila a le komiti o Faatonu a le Iunivesete o le Pasefika i le taulamua o Fiame Naomi, i le taumafaiga o le faatuina o le Iunivesete o le Pasefika mai i le amataga seia oo mai i le taimi nei.

E ese lagona na oo iai le mamalu o le faapotopotoga, a’o latou patipatia le faaeaea a le Iunivesete a le Pasefika i Saute i le Sui Palemia. O le sui faaao o le Iunivesete na ia faaofu le Sui Palemia i le ofu talaloa lanu moana ma le tosi lanu mumu e tasi, atoa ai ma lona pulou, a’o molimau e le mamalu o le atunuu.

Taimi na faatino ai le faaeaea a le Iunivesete o le Pasefika i Saute mo le Sui Palemia, Afioga Fiame Naomi Mataafa

Taimi na faatino ai le faaeaea a le Iunivesete o le Pasefika i Saute mo le Sui Palemia, Afioga Fiame Naomi Mataafa

O le ofu e pei ona laeiina e le Sui Palemia, o laei o le tagata ua faaeaina i le faailoga o le fomai poo le Doctor.

Na mae’a ona usu lea e le aufaipese o le vii o Lotofaga, a’o saasaa le afioga i le Sui Palemia, ae aiuli iai nisi o lona aiga ma le paia i le afioaga o se faiga ua molimauina e na’o Samoa le atunuu ua o latou faia lea tulaga a’o faagasolo taualumaga o se sauniga taualoa o le faauuga.

I le saunoaga a le afioga i le fomai, le Sui Palemia, na ia ta’ua ai lona agaga faafetai, i le komiti faatonu a le USP mo le faaeaea, ua faaeaina ai, ae e fia agai lana tautalaga i le aufaauu, poo i latou ua faasino iai le aso taupoina. “

Mo outou le aufaauu, o le tāua o le aso lenei, o outou o loo atoa iai sui eseese mai i le Pasefika.” “E lua lava vaega o la’u tautalaga ou te fia faamamafa iai la’u tautalaga.”

“Muamua, e tele lu’itau faigata ua ou asaina i la’u faiga malaga, e lē gata i tulaga tau aoaoga, ae o la’u malaga faatagata polokiki.” “Peitai o le luitau aupito sili ona tāua ia te au lo’u taumafai lea ina ia aoao uma manatu ma fingalo o taitai o le Pasefika ia tutu faatasi uma e galulue ia ausia ni faiga e lelei uma ai atunuu o le Pasefika, ma faatoa mafai ona ausia ia sini pe a galulue faatasi uma atunuu o le Pasefika.”

O le lona lua o taiala na agai iai le saunoaga, o lona fautuaina lea o alii ma tamaitai ua faauu ia avea ma ni taitai lelei i le lumanai.

“Ou te faalaeiau atu ia te outou, ia avea outou ma ni taitai lelei i o outou atunuu, ma ia aua nei outou manatu faapito, i le faatinoga o outou tiute ma galuega o le a outou galulue iai.”

Na ave le faafetai a le Sui Palemia i ona aiga, uo ma ē masani o loo latou mafuta ma galulue, e lē gata i lea o i latou o loo tumau pea lo latou lagolagoina o ia ma lana faigamalaga i upufai a le atunuu.

“Ou te fia faafetai faapitoa i lo matou aiga, ma a’u uo, o loo lagolagoina lo’u nei tagata, aemaise o la’u faafetai faapitoa i nai o’u matua ua fai i lagi le folauga, ae analeseanoa laua out e lei oo mai i lenei tulaga ua ou iai.”

O Fiame Naomi e toalima iai sui o le Pasefika ua tofia e le komiti faatonu o le USP e ave iai le faaeaea ona o latou tautua.