E lei faigofie ona talia e le tina talavou ia Mata Tauiliili le tala faanoanoa na auina mai i Samoa e uiga i le sauaina e nisi o alii o lona toalua ia Jeremiah Malaki Tauiliili i le falefaafiafia o le Marina Bar and Restaurant. O se tasi lenei o faalavelave matuia ua logo ai tulimanu e fia o Samoa aemaise le lalolagi atoa.

O le tina talavou ia Mata Tauiliili, na malaga mai i Niu Sila nei ma lana tama ma nonofo ai auā le toe faaauauina o ana aoga ma faigaluega auā se manuia o le la aiga, ae sa nofo pea i Samoa si ona toalua ia Jeremiah Malaki Tauiliili ma faigaluega ai o se Civil Engineer mo le Matagaluega o Galuega. O le masina o Iuni na toe malaga mai ai Jeremiah Malaki Tauiliili ma toe avatu lona atalii la te mafuta i Samoa, ma faapea ai lava ona faaaiga lua ona o galuega.

O le tulai mai o le faalavelave ia Jeremiah Malaki Tauiliili, o se ipu inu gata tele isi ona toalua ia Mata Tauiliili auā ua fetaui le tulai mai o lenei faalavelave ae o loo valavala le la aiga i nofoaga.

Ae pau le vaega sa tau faafaigofie mai i le lagona o Mata i lea taimi, ona ua fetaui le tupu mai o le faalavelave i lona toalua ae o loo iai lona tina i Samoa le faletua ia Latafale Marilyn Lavea, ma o se avanoa lea sa faafaigofie ai ona maua fesootaiga a Mata ma le faalavelave ua tulai mai i si ona toalua.

Na faaalia e le tina o Mata, Latafale Marilyn Lavea, o le taimi atoa na taoto Jeremiah i le falemai e lei toe alu ese ai, e oo foi i tuaa o Jeremiah ma lona aiga atoa ua nonofo ai i le falemai i taimi uma ona ua latou vaavaai ma molimauina le ogaoga o manu’a ua aafia ai Jeremiah. Na taumafai togafitiga a fomai i Samoa mo le laveaina o lona ola peitai ua siliga taliiseu, ua maua e fomai e matuia manu’a o loo aafia ai lona ulu.

Jeremaih ma si ona aiga i lona faauuga

Jeremaih ma si ona aiga i lona faauuga

Na talosaga aiga na lua i fomai pe mafai ona aumai Malaki i Niu Sila e fai ai ona taotoga, auā o ia o se tagata ua nofomau i Niu Sila, e lē gata i lea, e tele atu avanoa e ono maua se togafitiga e ono faasaoina ai lona ola i falemai tetele iinei.

Ae o le tali a fomai i Samoa e faigata ona aveese Malaki mai masini o loo faaaogā mo ona togafitiga, o lona uiga e aveese loa masini ona faaletonu lea o lona ola.

Na finau lava aiga mo se fesoasoani ma iu ai lava ina savalia le malo mo se laveai, na tali lelei e le malo le talosaga a aiganalua, ae na faigata ona aumai i Niu Sila, ona ua faaletonu atu le tali a le falemai a Aukilani ona o popolega i tulai mai se faalavelave i le gasegase i luga o le vaalele ona tuua’ia lea o le auaunaga a falemai. 

Ona faaauau ai lava lea o togafitiga o Jeremiah Malaki i Samoa seia oo lava ina uma lona ola i le taeao o le Aso Lulu i le sefulu minute e tea ai le lua i le vaveao.

Ina ua maua faamatalaga i le faalavelave, sa manao Mata e malaga i Samoa i le Aso Sa, peitai, na taofi mai e mātua o Malaki i le faamoemoe e aumai iinei mo togafitiga, peitai, ina ua faaletonu lea fuafuaga na faato’a malaga ai Mata i Samoa i le Aso Gafua, e maliu Malaki ua iai Samoa si ona toalua.

O le aso 24 o Tesema, ua mae’a ona totogi ai pasese a Malaki ma lona atalii e malaga mai ai i Niu Sila e fai Kerisimasi ma lona toalua ae pagā lea ua lē tau lau o le faamoemoe.

I tusitusiga o loo i luga o upega tafailagi e uiga i lenei mataupu ua lipotia ai ua taofia ni alii se toatolu e le ofisa o leoleo ona o le faalavelave ua maliu ai nei Jeremiah Malaki Tauiliili, ae o loo faatalitali foi nisi o tagata suesue i Niu Sila nei o loo malaga faapitoa atu i Samoa e suesue le mafuaga tonu o le faalavelave.

Jeremaih ma Mata

Jeremaih ma Mata

O Jeremiah Malaki Tauiliili na sikolasipi faatasi mai ma lona toalua ia Mata i Niu Sila nei i le 2014, o Jeremiah na aoga i le Christchurch University, ae o Mata na aoga i Victoria University.

O le tausaga 2016 na faamanuiaina ai laua e le Atua isi o la alo tama e toatasi le alii o Leowiess Jeremiah Tagaloa Lavea Tauiliili, o le tausaga foi lea na faaauauina ai aoaoga a Jeremiah Malaki Tauiliili i le Auckland University of Technology, ma faauuina ai i lona faailoga o le Bachelor of Engineering Technology i le tausaga na tea nei. O le tausaga muamua lenei na galue ai o se Civil Engineer mo le Matagaluega o Galuega, e maliu nei o loo galue ai lava.

E ui i le tele o faamatalaga feaveai i le faalavelave lenei, peitai, o loo faaauau pea suesuega a leoleo, faato’a maua la atoatoa o lenei faalavelave matuia ua fano ai le ola o lenei alii talavou, pe a mae’a suesuega o lenei mataupu i luma o le faamasinoga.