Ua teena e le taitai o le atunuu, Tuilaepa Lupesoliai Sailele Malielegaoi, fuafuaga o le fausia o se faletalimalo tele i lona itumalo i se taimi lata mai. Ma o le mafuaaga foi lea o le to o le matupalapala i le taitaifono o pisinisi i le Pasefika talu ai nei o Tulaniu o Atua Kostas.
Na soisoi le taitai o le atunuu, ma ia faapea mai e lē sa’o ia faamatalaga. “E leai se mea faapena ua faatalanoaina ae la lava sa talanoa mai, a iai lava se atinae e fia fai, e fiafia lava ia e fia fai mai sona sao.”
“Masalo poo ai foi se gutu umi sa tafaovale ai i tuā, na foi ua sau fai lena faamatalaga, auā o le toatele ia o le au gutu uumi sa ou vaai mai iai i tuā.” Talu ai nei na faataunuu ai le saofai o lea foi alii faipisinisi i le itumalo o le Palemia. O le faamoemoe o lea alii ia mafai lea ona fai mai sona sao i le atunuu. O le silasila mamao a le malo, o loo taulai lea i le taligamalo a le atunuu i le 2020, i le fonotaga tele a taitai o malo o le taupulega lea o le a talimalo ai Samoa mo le taimi muamua. “O le taimi muamua lenei o le a talimalo ai Samoa, i le fonotaga lea, lona uiga e moomia le lava lelei o faletalimalo e tali ai le taunuu mai o malo mai fafo.”
Na fesiligia le taitai o le atunuu, pe o se tasi lea o mafuaaga o le naunau ina ia faataunuu pea le fausiaina o le malaevaalele i Ti’avea, e fesootai ma le atinae o le fausiaina o le faletalimalo.
Peitai na saunoa le Palemia, afai o le tulaga lea, lona uiga ua vaapiapi tele le silasila a le malo, pe faaituau foi. “O le silasila a le malo e lautele, e lē vaapiapi, o loo vaai le malo i ni auala e manuia lautele ai le atunuu atoa.”
“Ua silasila le malo o avanoa faapenei e tai pei o le toso mai o tagata faipisinisi i le atunuu e mafai ona o latou fausia nisi pisinisi poo faletalimalo foi e maua ai avanoa faigaluega mo tupulaga i le atunuu.” “Tai pei o le fausia o le faletalimalo i Taumeasina, le la ua maua ai galuega a le toatele e fesoasoani ai i nuu, ekalesia ma aiga.” “E toatele tama ma teine ua uma aoga, ae leai ni galuega, lea la e ala ai ona taumafai le malo e toso mai i totonu.” Saunoa le Palemia o le faataitaiga lelei lava o le taumafai e aumai tagata faapenei, ua toatele foi tagata Samoa lava ia ua mau galuega i le faletupe o le Pasefika, poo le faletalimalo foi o le Taumeasina.
“Ua uma ona fai mai ia te au, o la’u tala la iai, aua ne’i toe agai e fau se faletalimalo i motu ia e tu ese mai i le mainland, e pei ona iai le Taumeasina ae agai mai i totonu o le mainland, e fau ai se atinae e fesoasoani ai mo Samoa.” Na tali foi le Palemia, ina ua fesiligia e pei o se meaula i tagata le malaga mai i Samoa o lea tagata to iai lona matupalapala i se suafa matai e toe foi ma ia. Saunoa Tuilaepa oi latou ia e malaga mai fafo ma faasuafa i suafa matai, ua na’o ni suafa matai e ave iai, e faailoa ai lo tatou faaaloalo, peitai e lē o ni suafa matai e mafai ona o latou tuufaasolo i nisi o latou aiga.
“O le matupalapala, ae lē faapea o se igaga to, e mafai ai ona ia tauaveina ma faasoa atu i lana fanau poo nisi foi ua finagalo iai.” “Ou te manatu o le tulaga tonu lava lena e ao ona malamalama iai le mamalu o le atunuu, o le malamalama mai i le mea tonu o loo finau atu ai nei le malo, mo le lelei o tagata uma.” E le gata i lea e pei ona ta’ua e le Palemia, o le atinae o le atunuu mo tagata uma e ave iai le silasila a le malo.
