Tālia le faaiuga mo Rose Hope Ah Leong

O le Aso Faraile nei 9 o Novema 2018 e tatau ona tolaulau ai se faaiuga mo le tamatai o Rose Hope Ah Leong 29 tausaga mai Leauvaa talu mai se faalavelave tau taavale na tulai mai i le afioaga o Faleula i le taeao o le Aso Sa 23 o Setema 2018.

O lenei faalavelave na so’a ai e le taavale o le ituaiga o le Tucson numera 27509 se teineitiiti 7 tausaga o Faleula, o Loi Vaialofa ina ua taumafai lea teineitiiti e kolosi le aualatele i le mae’a mai o le Aoga Aso Sa i lea taeao.

Na ta’ua i le lipoti a fomai e taunuu atu lea teineitiiti 7 tausaga i le maota gasegase i Ulumotootua ua maliu ona o manu’aga i lona faiai. Maua foi i faamatalaga o lea faalavelave, le matapogia ai o le tamaitai o Rose Hope Ah Leong i le taimi na tupu ai le faalavelave, ma e malamalama ane o loo i le maota o le faafeagaiga o le afioaga o Faleula.        O loo masalomia le faate’ia o lea tamaitai 29 tausaga i lenei faalavelave ona e lei fuafuaina.

I le faagasologa o faamatalaga i luma o le faamasinoga na ta’ua ai e le tina o le teineitiiti 7 tausaga ua maliu, le mae’a lea ona faia o se faaleleiga a le latou aiga ma le aiga o le tamaitai o Ah Leong.

Ua mae’a foi le ifoga e pei ona masani ai le aganuu a Samoa, e $50,000.00 le tinoitupe atoa, o meaai ma le faatupeina atoa o le maliu o Loi Vaialofa ma lona tuugamau na mafai ona tuuina atu e le aiga o Ah Leong, ma ua taliaina foi e lo latou aiga.

Ta’ua e le tamaitai faamasino ia Alalatoa Rosella Papalii, o le a ia silasila toto’a i le mataupu lenei ma se faaiuga talafeagai e tatau ona faia iai. Saunoa le tamaitai faamasino, e toatele i latou o loo mulimulitai i le faamasinoga lenei ona e manatu nisi o le tamaitai o aafia, o Rosa Hope Ah Leong, o le afafine o le Minisita o le Kapeneta, peitai e leai lava se eseese o lenei mataupu ma nisi o mataupu o molia atu ai nisi o le mamalu o le atunuu.

Tusa lava foi pe o se afafine o le Palemia, poo se Ministia, pe tele foi ana tupe pe leai ae e lē mafai ona suia ai le mea moni, o le tulai ai i luma o le faamasinoga pe afai e soli le tulafono.

  Saunoa le tamaitai Faamasino ia Papalii, o vaega e pei ona folasia i le faamasinoga lea na tapena e le aiga o Ah Leong, ua ova atu ma vaega na manatu iai le faamasinoga. Ua faamauina foi i le faamasinoga le maualuga o le tulaga ua oo iai tapenaga a le aiga o lē ua tuua’ia faatusa atu i nisi o mataupu faapenei na oo muamua atu i le faamasinoga.

Ta’ua e Papalii le tele o aafiaga o lenei mataupu e lē gata mo le teineitiiti ua maliu ae faapea foi mo le aiga o le tamaitai ua molia.

Na tumutumu le potu faamasino i aiga o le tamaitai o Rose Hope Ah Leong na lolofi atu e tapuaia taualumaga o lenei faamasinoga. Ae ua faamanino mai foi e le aiga o le teineitiiti ua maliu, le tulaga ua sologa lelei ai le latou faiga aiga ma le aiga o le tamaitai o Ah Leong.

E pei ona silafia o le tamaitai o Rose Hope Ah Leong, o se tagata faigaluega i le Matagaluega o Tupe Maua a le atunuu, Ministry for Revenue, o le afafine foi e faasino i le Minisita o Tagata Tafafao Maimoa mai Fafo le Afioga ia Sala Fata Pinati.

O le Aso Faraile nei ua faamoemoe e maua ai se faaiuga o lea mataupu mai i le faamasinoga.