‘Eli le pu ae togi iai matou, matou te feoti ai lava iinei

O le vaega tonu lena o le fanua ua manao auaiga o Tokuma e tanuola ai latou ae lē o ese ma le fanua
O le vaega tonu lena o le fanua ua manao auaiga o Tokuma e tanuola ai latou ae lē o ese ma le fanua

E mauaa pea le talitonuga ma le finagalo faaalia o se tasi o le fanau oi latou na tupuga mai ia Tokuma Torurae, o se alii Solomona, na galue i faatoaga koko a le malo e aunoa ma se totogi. O Aiga Tokuma, o le uii o le fanau e toa 11 a le toeaina o Torurae, na fesiligia e le tusitala, poo le ā le isi a latou gaioiga o le a fai nei, ina ua mae’a le faamasinoga o talosaga toe iloilo, e lē faamanuiaina le latou finauga o loo finau ai, o i latou e ana le fanua o loo nonofo ai nei i Sogi.

O se mataupu ua leva ona finau ai le aiga o Tokuma, ona fai mai latou o le meaalofa na faimeaalofa ai le uluai Palemia o Samoa i lo latou tamā ona o lana tautua i le malo Samoa.

E lē gata i lea fai mai o le tuua’i sese o lo latou tamā i le fasiotia o se alii faipisinisi i lena vaitau, lea na toeitiiti faasala ai i le oti.

Ae na faaalia e Aiga, e le taitai ona o ese ma Sogi. “E te iloa oe, poo le ā lava le faaiuga a le faamasinoga, matou te lē o ese, pau a na o le tala, matou te lē o ese ma eleele nei, ua tele a matou tupe ua faaalu ai i le tanu ma faato’a ia mafai ona matou nonofo ai.”

Faaalia e Aiga e lē o le taimi muamua lenei ua taumafai ai le malo e aveese latou ma Sogi.

“Ua faafia na aumai tusi e aveese ai matou ma iinei, e matou te lē o ese ma iinei.” Fai mai Aiga, na iai le vaitau a’o soifua Tofilau Eti Alesana, na avatu ai masini e sua ese ai latou.

“Oka se laina taavale a le malo na omai, aumai ai ma masini, o kekapila ma uapako, e omai e sua ese ai matou ma iinei.”

“Matou te lei solomuli ai, matou te lei fefefe iai, e omai ae matou laina atu i lalo o le mago lale, o matou ma o’u tuagane ma o’u uso, ma latou fanau ma matou uma.”

“Ona valaau atu lea o le isi o o’u tuagane, ua lelei ua fetaui lelei lo outou taunuu mai, ma aumai tou masini na, omai e ‘eli se pu telē lava, togi iai matou ma matou fanau e matou te feoti ai lava i eleele nei.” “Ia faaaogā ai tou masini na ua aumai, matou te lē o ese mai iinei, e matou te feoti ai lava.” Saunoa Aiga, o le vaitau lena o Tofilau, o le taimi lenei ua avea ai Tuilaepa ma Palemia, o le tali foi lena e ave ia Tuilaepa.

O le fale o le aiga i luga tonu o le fanua o loo finau ai nei
O le fale o le aiga i luga tonu o le fanua o loo finau ai nei

“Aumai latou masini, e ‘eli ai se isi pu telē lava, i luma o le matou fale lea, ae lafoai uma iai i totonu matou ma matou fanau, ae tumau a le matou tali matou te lē o ese ma iinei.”

O le auaiga o Tokuma, pau lea o le aiga o loo totoe i Sogi, e lei o ese ona o le talitonuga e pei ona ta’ua. O isi aiga ua o ese uma ma Sogi, ina ua faamalosia e le malo ua tatau ona o ese. O le 2011 lea na ave faamalosi ai e le malo, le lapataiga ua tatau ona o ese.

O le 2011 foi, lea na faamatuu ai e le malo se vaega fanua i Falelauniu e faasee iai aiga Sogi. O le tuutuuga o le tai kuata eka mo aiga, ma e nofo lisi ma togitogi le tau o le fanua, seia mae’a ona totogi le tau o le fanua ona motu lea e umia e le aiga lava ia.

E 30,000.00 tala e togitogi faalisi i le malo. E ta’i toluafe tala na ave e le malo i aiga taitasi e tapena ese ai, e aofia ai ma le falesa ma le fale o le faifeau. Na oo le mataupu lenei i le faamasinoga maualuga i Apia, ma na molimau ai le tuagane o Aiga, o Nanai Tokuma ma ia ta’utino i le faamasinoga o faamatalaga na faamatala atu e le lo latou tamā, o eleeele o loo nonofo ai nei na faameaalofa atu e le Palemia muamua o Samoa. Peitai e lei taliaina e le faamasinoga le molimau ona fai mai le faaiuga o faamatalaga tuu tala (hearsay). Na toe apili e le auaiga le faaiuga a le faamasinoga maualuga. O le apili fai mai e sese le faaiuga a le Faamasino, ona o lona lē faaaogāina o faamaoniga tuutaliga lea na molimau ai Nanai. E lē gata i lea e lē agavaa le alii loia na ia faia le mataupu.

Peitai o le faaiuga a le faamasinoga toe iloilo, ua faalēaogaina le apili, ae toe totogi foi e le itu apili le $5,000 tala i le malo. Ae na saunoa Aiga latou te lē kea i le faaiuga, ae o latou e lē o ese ma Sogi.