Ua le talia e le Faamasinoga le tagi a Mark Hunt e faasino ia Brock Lesnar, le UFC ma Dana White le pule o le UFC. O le tagi e faasino lea i le fusuaga a Hunt ma Lesnar i le 2016. I le fusuaga lea, na manumalo ai Lesnar ia Hunt, ae mulimuli ane na faalēaogāina ai le manumalo a Lesnar ina ua maua sa ia faaaogāina fualaau faasāina, fualaau e faatupu maso ma faate’i tino.
O le taofi a Mark Hunt, sa tatau ona foi atu ia te ia le manumalo o le fusuaga lea, faatasi ai ma le tupe manumalo o le taaloga. O le 2017 na faatino ai le tagi a Hunt i Nevada, USA. O tele mau o le tagi na aafia ai tulafono a le Setete o Nevada ma molia ai e Hunt le Setete; O le gaoi i lalo o le tulafono a le Setete; Faalēaogāina o le Konekarate na galue ai Hunt i le UFC; Faaoaina le tatau o Lesnar; Osofaiga ma le faaoolima o Lesnar; ‘Auai i le faaoolima, o le mau lea faasino ia Dana White; ma le Fouvalega o ia i lalo o le tulafono a le UFC ma le Setete o Nevada.
O le aso 14 o Fepuari na lau ai faaiuga o le faamasinoga, na teena ai e le tamaitai faamasino o Jennifer Dorsey mau uma o le tagi a Mark Hunt. E na’o le tasi le mau na pipii, o le faalēaogāina o le feagaiga ma le UFC. Na fautuaina ai e le faamasino pati e lua e fai se feiloaiga e soalaupule ai lea mataupu ma sa’ili ai se ioega lelei, ma se aofaiga o seleni e teuteu ai le mataupu.
O le ‘autu o le tagi a Hunt o le faatagaina lea e le UFC o Lesnar e fusu a’o faaaogā e ia fualaau faasāina. Mai lea tulaga, ua fesoasoani ai le UFC i le solitulafono a Lesnar. A’o le mau i le faaoolima o Lesnar, e mafua mai lea i le faatagaina o faaiuga o le fusuaga a’o solitulafono le alii fusu, Lesnar, i lalo o tulafono a le Setete o Nevada.
E lei talia e le faamasino lea mau. O lana taofi, o tagata fusu a le UFC e ao ona auai i fusuaga uma ma le iloa e iai le avanoa tele lava o loo faaaogā ai e tagata fusu uma fualaau faasāina. E le i talia foi e le faamasino le faaoolima le tatau o Lesnar i le taimi o le fusuaga ma Hunt. Fai mai Dorsey, na manino ia Hunt lamatiaga uma o fusuaga faapenei. O manu’aga foi na oo ia Hunt mai le fusuaga o manu’aga masani o fusuaga faapenei a le UFC ma le MMA (Mixed Martial Arts). E lei iai ni manu’aga ese ai. E ese lea i le mau a Hunt, na manu’a o ia i fafo o le tulafono, aua e lei faatagaina ona faaaogāina e tama fusu fualaau faasāina.
O le mau foi a Hunt, na iloa e le UFC, Dana White le alii pule, ma Lesnar le tagata fusu, le solitulafono a Lesnar i le faaaogāina o fualaau faasāina a’o loma le fusuaga, ae e lei taofia ai Lesnar mai le fusuaga i le 2016. E oo foi ina ua manumalo Lesnar i le aso lea, 9 Iulai 2016, sa le tatau ona oo i lea faaiuga. O le mau a le faamasinoga na faasa’o e le UFC lea tulaga ina ua faalēaogāina le manumalo a Lesnar. O le mau a Mark Hunt, sa tatau la ona foi atu ia te ia le manumalo, ma ta’ua ai o ia na manumalo i le fusuaga.
Ae e lē o le tulaga lea na oo iai. Na faalēaogāina e le UFC le faaiuga o le po ma ta’ua ai o le “No Contest” le faaiuga o le fusuaga. Na faasala ai e le Setete o Nevada is Lesnar ona o le solitulafono i le $250,000.00. Mai lena taimi e lei toe fusu ai Lesnar i le UFC. A’o Hunt ua mae’a lana feagaiga e fusu ai mo le UFC, o le fusuaga mulimuli o le masina o Tesema 2018. I le taimi o le lomiga e lei maua ai se faamatalaga mai le UFC, Dana White, Brock Lesnar poo Mark Hunt e uiga i le faaiuga a le tamaitai faamasino.
