T

Faamata e toe manatua e le mamalu o le atunuu, aemaise le aufaitau, se tasi o mataupu na alia’e i le vaitau tonu lea na iloa ai faailoga i le tino o le tamaitai o Toaipuapuaga Patrick Oeti, le afafine o le faifeau Ekalesia Faapotpotoga Kerisiano Samoa, – EFKS i Pata Falelatai, Susuga Opapo Soanai Oeti, e faapea o puapuaga o le tatou Faaola.

O faailoga vaaia  i le muaulu, o lea tamaitai e tafe mai ai le toto ua foliga tutusa ma le totolia o le muaulu o Iesu , atoa ai ma lima o lea tamaitai , atoa ai ma le tafe mai o le toto i le ogatotonu o le fola o le alofi lima o ona vae ma le papatua e faalava solo ai faailoga i lona papatua pei e sasa e nisi i se mea maai.

E le gata i lena o ana tusitusiga e tusia i le gagana Eperu, lea o lo o aumai ai feau o le filemu  e pei ona faailoa e lea tamaitai. O faailoga ia na taitaiina atu ai loa i se faaiuga na faia e le Ekalesia EFKS i lena vaitau, o le aveesea o tofi faafaifeau a le Susuga ile toeaina, o ia foi o le faifeau a le Ekalesia i Pata Falelatai.

E maea ane ona aveese tofi o le faifeau, ae mapuna ane loa ma tusitusiga a le OLP faatatau i le faifeau ma lona afafine o Toaipuapuaga. O tusitusiga a le OLP – O le Palemia, o lo o tuuaia ai Opapo e faapea na toe fanau ai lava lona afafine, le tamaitai o Toaipuapuaga, ma o le tama a Toaipuapuga  o lo o i ai nei, (ulumatua) o le tama a Toa i lona tama poo o le Susuga i le Faafeagaiga.

Na oo atu tusitusiga a le OLP, i le togi o lana lu’i i le faifeau e tatau ona faia se suesuega faapitoa, faasaienisi poo o le DNA ole tama a Toa e faamaonia ai lana mau. Oni tuuaiga na faaalia e Opapo i fafo o le potu faamasino na iloga ona matua aafia ai lona aiga aemaise o lana fanau.

O tuuaiga poo tusitusiga foi ia, na toe lomia i le nusipepa o le Samoa Observer ma atili ai tele le mataupu. O le aso Faraile na te’a nei, na amata ai loa le suesuega a le faamasinoga maualuga ina ua ave e Opapo le nusipepa o le Samoa Observer i le faamasinoga ona o le faia o faamatalaga ua maasiasi ma ua aafia ai lona aiga atoa ai ma le aafiaga o lona tofiga faafaifeau.

I le faamasinoga na faaalia manino ai e Opapo, lona tiga aemaise le aafia o ona lagona i nei faasalalauga faasaga ia te ia ma lona afafine. 

Faimai lana molimau o faamatalaga ia na atili faaopoopo ai le mamafa o lana faasalaga i le lotu, ma e ui ua toe faaa’e ona tofiga faafaifeau, peitai e le o mate ai faamatalaga na lomia ma toe lomia e le Samoa Observer faasaga ia te ia.

Na molimauina foi e Opapo, o ia e seasea ona agai i le facebook peitai faatoa ia iloa ina nei tuuaiga mataga, ina ua toe lomia e le Samoa Observer faamatalaga faasaga ia te ia. 

Na ia molimau foi i le tele o le aafiaga o lona lotoifale i nei tusitusiga, ma na oo lava i le tulaga o le amusia o ia ma lona aiga. E na o le toatasi le molimau a le Samoa Observer o Mataafa Keni Lesa lea na finauina o tusitusiga na tusia e le OLP ma e leai se isi o le ofisa e na te iloa poo ai OLP e ana tusitusiga. E 750,000 afe tala le su a Opapo faasaga i le nusipepa ale Samoa Observer.   Ua tolopo le mataupu mo le faaiuga a le faamasino i le aso 22 o le masina nei.