Na saunoa se tasi o tina usufono ile Fonotele ale Ekalesia Faapotopotoga Kerisiano Samoa e iai le taua ole totogi o lafoga a faifeau tausi nuu ile Malo ina ia laugatasia ai tagata uma amata mai ile aufaigaluega ale Atua.
Ole finagalo foi o lea usufono na faaalia ile fonotele o tupe totogi o lafoga e toe iai foi isi auala e toe foi atu ai ile aufaigaluega ale Atua.
Peitai e ui ina leotele le finagalo o lea usufono ae na matuā mafuli finagalo faaalia o usugafono ile teena ole fuafuaga ale Malo. Saunoa se tasi o usufono e le fetaui le manao ole Malo ile totogi atu o lafoga a faifeau tausi nuu auā a tuu ise tulaga faigofie o tupe o alofa o faifeau o tupe mai le loto malie o tagata lotu.
E eseese le maualalo ma le maualuga o tupe e ave i alofa ma e le ose totogi e tatau ai ona aveese ai ma se lafoga mo le Malo. Na saunoa se isi usufono talu ona faailoa lea manao ole Malo e lei toe tusia sona alofa i lo latou faifeau ae ua tuu ile teutusi ona ave sa‘o lava lea ile aao ole faifeau.
Na faaalia e se tasi o faifeau EFKS oloo avea nei ma Failautusi Aoao ole Fono a Ekalesia le susuga Maauga Motu i sona finagalo na faaalia ile mataupu i luma ole Fonotele, sa manatu le Fono a Ekalesia Soofaatasi e tuu pea i ekalesia e faia ei latou le faaiuga ole mataupu ae aua ne‘i faia e le Fono a Ekalesia.
Ole mafuaaga lea na taatia atu ai ile Fonotele ale EFKS o lenei tausaga e soalaupuleina le mataupu ma faia iai se faaiuga e pei ona togi ai i fafo ma teena e le Fonotele.
Na faaalia foi e Maauga i lona finagalo ile Fonotele ua mae‘a ona tuuina atu ile Fono a Ekalesia Soofaatasi le finagalo ole Ekalesia Katoliko ua faaalia ai le lagolago a lea ekalesia ile fuafuaga ale Malo.
Peitai ole Ekalesia Metotisi ua oo atu foi le latou faaiuga e tetee ile faia oni lafoga a faifeau tausi nuu.
Ua fuafua e tuuina atu se tusi mai le Fonotele e faailoa aloaia ai ile Palemia ma le Malo le finagalo ua autasi iai le ekalesia aoao i lana Fono faaletausaga sa usuia ile vaiaso ua mavae. Ole toe iloiloina e le Matagaluega o Tupe maua ole mataupu i lafoga totogi, e le gata oloo silasila ai ile faia o lafoga a faifeau tausi nuu ae faapea foi mo le Ao ole Malo.
E lei maua mai se faamatalaga ile Matagaluega o Tupe Maua pe ole a se finagalo ole Ao ole Malo ile mataupu, ae ua faailoa ese molimau faatuatuaina oloo lagolagoina e le Ao ole Malo le fuafuaga mo le totogi oni ana lafoga mai tupe o faamanuiaga oloo ia maua e ala i lona totogi.
