Ole vaiaso asau e amata ai galuega ale Komisi Suesue ua filifilia e le Malo e silasila i nisi o mataupu ua aliali mai i totonu ole Matagaluega o Leoleo, faapea nisi mataupu e silasila le Komisi e tatau ona oo iai le latou suesuega. Ole faaiuga ole vaiaso ua mavae na faailoa ai e le Malo le amatalia o galuega a lea Komisi suesue e pei ona iai se faaiuga ale Kapeneta ini masina e lei mamao atu o lenei tausaga 2017.
E pei ona silafia sa tofia ele Kapeneta sui ole Komisi Suesue ma faailoa i sana faaiuga ae e lei faailoaina ai poo ai ole a avea ma taitaifono auā e masani lava ole Komesina o Sulufaiga e taitaifono i Komisi Suesue ua mae‘a, e pei ose isi suesuega na faia foi ile Matagaluega o Leoleo.
Ose tasi o faamasino sinia ole Faamasinoga Maualuga ale atunuu ua malolo litaea le afioga Lesatele Rapi Vaai ole a taitaifono. Ua tele tausaga o galue lenei tamalii ile Faamasinoga Maualuga a Samoa ma ole masina o Mati ole tausaga nei na ia tuua ai le galuega ina ua aulia tausaga ole soifua e faamuta ai lona tofiga faamasino.
O sui ole Komkisi Suesue ole faletua le afioga Tavui Annie Laumea sa galue ose leoleo ma na ia tuua le galuega o ia umia le tulaga faaleoleo ole Police Inspector poo le Taitai Leoleo.
O ia le uluai tamaitai leoleo na ausia lea tulaga maualuga i lona taimi a‘o galue ile Matagaluega o Leoleo.
O isi sui ole Komisi ole susuga ile Faifeau, ole taitai ole ekalesia Worship Center le Aposetolo susuga Viliamu Mafoe, ma le tasi o sui ole Komisi ole susuga Namulauulu Sami Leota, ose tamalii sa avea ma taitai ole ‘au ale Manu Samoa ile Ipu ole Lalolagi ua mae‘a.
E lei faailoaina mai ile faasalalauga faalauaitele tiute ole Komisi Suesue ae ua mae‘a ona faailoa ile pepa ole faaiuga ale Kapeneta na muai faailoa ai le faia ole Komisi Suesue nisi o vaega autu ole a agai iai suesuega.
O nisi o leoleo oloo faamalolo lē tumau ile taimi nei e aofia ai se tasi o Komesina Lagolago le afioga Mulinuu, ose leoleo taailua le susuga Hillary Eteuati, faapea se Leoleo Asiasi poo se Police Inspector ua faamavae le susuga Leiataua Samau, ole a suesueina ini tuua‘iga o amioga tau leoleo ua latou solia.
E pei ona silafia ole molia ole Komesina o Leoleo le afioga Fuiavailili Egon Keil, ole taimi lea o loo avea Mulinuu ma sui Komesina, ae ole susuga Leiataua sa taitai ile suesuega o tuua‘iga faasaga ile Komesina o Leoleo.
O Hillary Eteuati ose tasi o leoleo sa auai ile pueina ma le taofia ole Komesina o Leoleo. Peitai o mataupu ole a suesueina ai i latou e leai se sootaga ile gaioiga na loka ma molia ai le faauluuluga ole Matagaluega, ae o ni tuua‘iga ile aafia o latou tiute faaleoleo ini amioga ua masalomia lo latou solia ai o tulafono faaleoleo.
Ole Aso Lua 6 o Iuni e amata ai galuega ale Komisi Suesue ise tasi o potu ole Faamasinoga Faaitumalo, ma ole a tatala mo le lautele ole atunuu e fia auai e molimauina taualumaga o galuega ale Komisi.
