O Bill English ole Palemia ua atoa iai le lima o taitai ole Malo o Niu Sila ua faaee iai se suafa matai o Samoa. Na muamua Robert Muldoon na faaee iai le suafa Leasapai, sosoo ai ma David Lange na faaee iai le suafa Tagaloa ina ua asiasi i Samoa ini tausaga ua mavae, sosoo ai Jim Bolger na faaee iai le suafa Nanai, lona tolu le alii Palemia o John Key na ave iai le suafa Toosavili o Poutasi Falealili ma Bill English ua faaee iai le suafa Leulua‘iali‘iotumua ole aiga o lona faletua o Mary mai le auaiga o Scanlan i Faleula.
Ole sootaga lea ole faaeeina ole suafa matai o Bill ona o lona faletua ole alo tamaitai o George Scanlan o Faleula. Sa molimauina le sootaga faaleaiga ole Palemia o Niu Sila i Samoa mai lona faletua ona sa auai ile faafotu tupu le Hai Komesina o Samoa i Niu Sila le afioga Leasi Papalii Tommy Scanlan.
Na faaalia e le afioga Leulua‘iali‘iotumua Bill English ose faaaloalo maualuga mai le aiga o lona faletua ua tuuina atu ia te ia ma ole a lē faatamala ile tausia ole mamalu ole suafa aemaise ole mamalu ole aiga.
Na molimauina ile faafotu ole vaa alii ile Aso Faraile ua mavae le faatumulia ole maota ole afioga ile Toetaufanua i Fogaa i paia maualuga ole nuu faapea le Malo na auai e fia molimauina le faee atu ole suafa matai ole Palemia o Niu Sila a‘o i Samoa mo le lua aso e le gata ose malo faaaloalogia ale Malo o Samoa i sauniga ole Tutoatasi, ae sa avanoa ai foi ona ia asiasia nisi o galuega ma atinae oloo fesoasoani iai le Malo o Niu Sila.
E sefulu afe le seleni na tuuina atu ile afioaga o Faleula ina ua mae‘a le faafotu tupu lea na taualuga i faaaloaloga masani faaleaganuu e pei ona sa ta‘i ai le sua mo le alii Palemia o Niu Sila ma lana aumalaga, faapea foi ona faia faaaloaloga mo le Palemia o Samoa ma nisi o mamalu faalupe sa auai.
Na mae‘a le saofai ona tuua lea ele Palemia le afioaga o Faleula ae faatino lana asiasiga ise faatoaga koko i Fasitoo-uta oloo auina i Niu Sila fua o lea faatoaga mo le gaosia ole sukalati. O lea faatoaga e tusa ma le 20 eka oloo faato‘a ile koko.
