Faamuamua e Jay Lagaaia lona faasinomaga

Jay Lagaaia
Jay Lagaaia

Ua faailoa aloaia nei e le alo iloga o Samoa i luga o televise ma tifaga Jay Lagaaia le auai mai mo le aso faapitoa o Samoa i Sini nei le Samoa Day e faia Lea i Liverpool Whitlam Centre Iuni 12, 2017.

Ole sui ole Komiti o tapenaga Brian Tonumaipe’a Tuisila na faamautuina mai. O lea aso ole a ofaga potopoto ai taitai ole Malo Samoa i Sini nei aemaise taitai o ekalesia ma pisinisi. Oloo afio atu foi le pulenuu o Liverpool afioga Mayor Wendy Waller.

Ua amata ile taimi nei feutagaiga a le Fono Aoao a Tagata Samoa i Sini ma le afioga ile pulenuu mo nai nofoaga e fausiaina ai se Maota o Samoa. Ole polokalame a Jay Lagaaia na ia talosagaina ai se 30 minute e faagasolo ai lana  polokalame pei na vaaia i luga ole televise, le Play School e fiafia ai ma fetufaai ma le fanauiti. Ole Play School ua loa tausaga o i luga ole TV ABC ma ua avea ai Jay Lagaaia ma pele i matua ma fanau.

E le gata i lea ua lauiloa o ia i ata televise iloga sa iai pei ole Home and Away, Water Rats faapea le Star Wars. Ose tagata talenia tele na amata mai Niu Sila ile 1988 ile pese ma sau ai lava. E manatua pea Jay Lagaaia e Samoa i lana malaga atu ma si ona tuaa ma asia lo latou aiga i Savaii ile tausaga 2000, ma faateia ai lona aiga ile auai atu ole aufai tv ma pu’e mai le polokalame  ole soifuaga ole tina ae lei tuua Samoa mo Niu Sila.

Ole auai mai o lenei alo iloga o Samoa, ole a ono luitau ai nisi o fanauiti ma unaia e o latou matua e tuliloa ni taleni o iai e faapei ole susuga Jay Lagaaia auā o lea aso ole a faatumulia i faafiafiaga a autalavou o siva ma pesepesega.