O le tausaga ua mavae 2018 e na’o le toalima pagota na sosola ma le falepuipui i Tafaigata. Na tautino le Minisita o falepuipui le afioga Tialavea Tionisio Hunt ina ua tali i faitioga a faipule, i le mafuaaga o le sosola soo o pagota.
Na saunoa Tialavea atonu o le toaitiiti o pagota na sosola i le tausaga ua mavae na mafua ai le faatamala o le pulega o falepuipui ma mafai ona sosola pagota e toalua i le mae’a o le lotu taeao a pagota i le Aso Sa i tua atu. “Sa ou lotu ai foi ae o le taimi ua tuua na toe o le aufaigaluega na tiute e ave pagota io latou potu na tupu ai le faaletonu”. “Ou te lē ‘alo i le ata o le niu i lea tulaga na tulai mai ma o le faatamala lea o a’u o le minisita ma le pulega o le falepuipui.”
O Iuni o le tausaga nei o le a siitia atu ai le falepuipui i le nofoaga fou ua lata ina mae’a fausia i Tanumalala. O se nofoaga ua iai le talitonuga o le a lē toe mafai ona sosola ai ni pagota auā ua fausia se pa uaea maualuga, e lē mafai ona a’e ai se tagata nofosala aemaise lava le itupa o alii, auā e lei sola lava se pagota tamaitai.
O le tautinoga a le minisita ua sasi ia ma le pulega ina ua sosola pagota o loo sailia nei e leoleo, na fesiligia ai e le Palemia le minisita pe o le taimi na fai ai le tatalo a le faifeau sa pupula fofoga o i latou sa lolotu pe sa moeiini. Na fautua ai le Palemia e silasila i se faifeau e faia le lotu a tatalo e pupula fofoga. Na tali Tialavea ma ia faaalia e iai lava le taimi e lē atoatoa ai le auaunaga auā e leai sē e atoatoa.
Taofi le toe galulue i tua o pagota
O se tasi o mataupu e aafia ai pagota o le taofia lea o le vaega o le au nofosala sa galulue i tua mai o le falepuipui. Oi latou ia e toaono sa galulue i le pou o le ofisa o faamasinoga i Mulinuu. E lei manuia sailiga i se finagalo o le Komesina o falepuipui pe aisea, ae ua faamaonia mai e le Pule Sili o le Matagaluega o Faamasinoga le susuga Papalii John Taimalelagi Afele, o loo faia se suesuega a le latou matagaluega ma le pulega o le falepuipui i le lipotia o le ‘onā o se alii pagota sa pou i le ofisa o faamasinoga, faapea ma le ma’itaga o se tamaitai pagota sa pou ai foi i lea lava ofisa o le Malo. “E sa’o le tulaga lena ae o le suesuega o loo faia o le a iloa ai pe na faapefea ona tupu ae pe iai foi se sasi i le pitolaau a le matou ofisa i le vaaiga o pagota”, na saunoa ai Papalii.
Ua faaalia e se molimau o le alii pagota na maua ua tago i le avamalosi sa faanoi e le ofisa o faamasinoga ma talia e le pulega o falepuipui e nofo e fesoasoani i feau o se fiafia a le ofisa o faamasinoga na faia i le po o se aso o le masina o Tesema 2018, a’o lei faia le Kirisimasi.
O le tamaitai pagota ua maua i le ma’itaga e faapea se molimau e lei faamaonia o sana uotama sa tuli foi sona faasalaga ae ua magalo, e masani ona asiasi i le ofisa o faamasinoga ma feiloai ai ma le tamaitai pagota.
