O le siitaga o totogi a le aufaigaluega a le malo, lea na faataunuuina i le aso muamua o Ianuari o le tausaga lenei, o se faiga ua silasila iai sui o nuu ma afioaga ma pulenuu o nuu i Samoa, o se faiga faaituau ma le lē talafegai.
O le fonotaga faaleaoaoga a pulenuu ma sui o nuu mo le uluai taimi e faamalamalama ai itu uma o le Palemene i ona matafaioi ma tiute aemaise o le mataituina lea o saunoaga o latou sui faipule i le maota, na lotea ai le mataupu lea.
Fai mai se tasi o sui o pulenuu ina ua faaleoina lona finagalo, pe aisea ua ala ai ona le aafia ai ma latou o loo gafa ma le tausia ma vaaia lelei o nuu ma afioaga i le siitaga o totogi o tagata o le aufaigaluega a le malo.
O le taimi nei, o loo totogi pulenuu alii i le lua selau limasefulu tala $250.00 i le tai lua vaiaso, ae mo sui o nuu tamaitai, e tai luaselau tala i le lua vaiaso, e iai le lua tala e aveese ona maua ai lea o le tupe mamā e selau ivasefuluvalu tala i le lua vaiaso $198.00.
“Ou te lagolagoina le mataupu lea, auā ou te lē iloa foi, pe aisea e toe aveese ai le lua tala ona aumai lea na’o le selau ivasefuluvalu tala, e tele a matou galuega o loo faia, ma ua tatau ona sii o matou totogi e pei ona faia i le aufaigaluega atoa a le malo,” pei o le faaseā mai a se tasi o sui tamaitai.
Peitai na malamalama lelei le faamalamalamaga a le Palemia, Tuilaepa Lupesoliai Sailele Malielegaoi ina ua fesiligia i lea tulaga. O le saunoaga a le Palemia, e iai lona eseesega, o alauni ia e totogi ai pulenuu ma sui o nuu, ae lē o ni totogi tumau pei ona faia i le aufaigaluega a le malo.
“E ese a totogi ese alauni e leai a ni tagata o totogi alauni e sii a latou alauni, e faapena i sui uma o Komiti a le malo, o loo totogi alauni, e leai se suiga ua faia iai.” Saunoa Tuilaepa, e fua le fesuiaiga o tupe maua i le galuega o loo fai.
“Manatua o le isi, a alu a le masina e leai se galuega o faia a’o la e totogi le alauni, o le isi e uma le masina e leai se fono ae la e totogi le alauni, afai e lē faia ni asiasiaga, o lona uiga e leai ma se galuega o fai, ae o la e fai lava e maua le alauni, o le eseesega lena.”
Saunoa foi Tuilaepa afai e iai se isi e lē fiafia i le mafuaga e pei ona ia faamalamalaina o lona uiga ua tatau ona faamavae ma le tofiga. “Faigofie lava ona faamavae ae sui se isi e avea ma pulenuu, o le mea moni o le matuā toatele a o tagata o la e fia pulenuu. O le matuā toatele lava o tagata o le nuu la e tilotilo mai o la e iai le agaga e fia pulenuu ma sui o le nuu, ma ou te iloa e sili ai ona tofia tagata na, ona afai ae avea ma pulenuu, ma sui o le nuu e sili atu le faatinoga o galuega latou te faia i totonu o nuu ma afioaga.”
“Pau a le mea a mafai ona sui le faiga, o le ave o le tofiga i le tagata o la e vae māmā, e o e fai asiasiga semanū e tele le suiga i le faatinoga o galuega a le malo i totonu o nuu ma afioaga” e pei ona saunoa iai Tuilaepa. E silia i le to’a limasefulu le aofai o pulenuu ma sui o le nuu na auai i lea polokalame faaleaoaoga.
