O se tasi lea o mataupu ua leva ona taoto i le Faamasinoga o Fanua ma Suafa i le sailia o le pule o suafa Luatuaolevaiula i le afioaga o Lotoso’a i Saleimoa. O se tasi o mataupu tele i le Faamasinoga o Fanua ma Suafa, ona e lē gata ina ua mae’a ona fai iai le faaiuga a le faamasinoga o uluai suesuega Court of First Instance, ona ave lea i le talosaga o faamasinoga toe iloilo e latou te iloiloina pe talia le apili pe leai.
O le faaiuga a le Faamasinoga toe Iloilo o le talia lea o talosaga toe Iloilo, ae ua faaaogā mai e le laulau a le Faamasino toe Iloilo le tulafono o Fanua ma Suafa 1981 i ona vaega 89, lea e o loo manino ai le tuuina atu lea o le malosiaga i le Faamasinoga e mafai ai ona o latou “faataatia ese pe suia se faaiuga o se poloaiga tumau a le faamasinoga i se faaiuga”.
Peitai o le finauga lea ua finauina nei e se tasi o sui o talosaga o le mataupu lenei, ua fesiligia ai le faamasinoga pe aisea e ala ai ona toe foi le mataupu lenei i le uluai suesuega ae lē fai e le laulau o faamasinoga toe Iloilo le faaiuga ona o le la ua oo atu ia te i latou le faaiuga.
E tele itu o le faamasinoga o le mataupu lenei peitai, o se mataupu ua leva ona tagofia, pe a fua lea i le 1994 lea na faia ai le faaiuga o le mataupu lenei, faamatuu le faatagaga i le aso 5 o Me 2009.
Fai mai le faatomuaga o le mataupu lenei e pei ona lomia i lana faaiuga o le toe iloiloina o le faaiuga LC3392 P10 –P26 a le Faamasinoga Muamua 31 Ianuari 1994:
1) O le aso 5 o Me 2009 na tuuina atu ai le faatagaga e toe Iloilo ai le Faaiuga LC 3392 P10-P26 o le aso 31 Ianuari 1994 (Faaiuga 1994) na faamaonia ai, o le Pule o le suafa Luatuaolevaiula e iai i itu o le Faamasinoga nei, ma o le Aiga Potopoto lea e filifilia se nofo poo ni nofo i le suafa Luatuaolevaiula o Lotoso’a Saleimoa.
a. Itu Tagi muamua (Papalii Ioane ma isi ) – suli o Luatuaolevaiula Vele Filipo suli oe na au i le suafa
b. tu Tetee 2 – (Nonumalo Leulumoega Sofara ma isi) suli o Nonumalo Faita o ē o loo tausia fanua o le aiga o Luatuaolevaiula Lotoso’a
c. Itu Tetee 6 (Papalii Sili Futialo ma isi) suli o Malietoa Laauli
d. Itu Tetee 9 (Fesalai Tua Patea ma isi ) suli o Patea o loo nonofo i Lotoso’a Saleimoa ma
e. Itu Tetee 10 (Nonumalo Noamaleniu ma isi) suli o Nonumalo Faalafua o loo nonofo i Lotoso’a.
Autu o le Suega: E leai se taiala o faatulaga mai i le faaiuga o le faatagaga e limataitaina ai le faigasuega a le Faamasinoga o Talosaga lenei, peitai e maitauina le eseese o finauga ma talitonuga i le pule, e oo lava i le afuaga o le suafa Luatuaolevaiaula o loo finauina e itu Faamasinoga. E faatauanau ai le talitonuga, e lē sootai lelei le faaiuga 1994 ma finauga na tagofia i lena faiga suega, ona e lē mafai ona sa’o uma finauga a Itu Faamasinoga ua tuu iai le pule ma ua aofia i le Aiga Potopoto o le suafa Luatuaolevaiula, pe a fua i nisi o molimau o le 1929 na usufono ai Luatuaolevaiula Vele le nofo mulimuli. O le tatai foi lea o mafaufauga i le finauga i le mafuaaga na pale ai Vele, aemaise o le lē au o so latou faasinomaga o Lotoso’a Saleimoa.
Mafuaaga: O le taunuuga o lenei iloiloga e faamaonia e eseese pule ma aiā sa finauina ae ua tuufaatasia e le Faaiuga 1994, ae e lē mafai ona sao uma nei pule. O le Aiga Potopoto na faamaonia e le Faaiuga 1994, e lē o se Aiga Potopoto e masani ai, e feiloai ma taupule ma tauosi. O lona uiga ua faaalia e le Faaiuga 1994 ia itu Faamasinoga ua tuu iai le pule ma aofia i le Aiga Potopoto, ae e lē masani ai.
E mafua ai le talitonuga e lē talafegai le faa aiga e le Faaiuga 1994 o Itu na faamaonia o le Aiga Potopoto o le suafa Luatuaolevaiula, auā e lē Aiga uma lava nei itu i le suafa Luatuaolevaiula o loo finau ai. O le faamalieina lea o le Faamasinoga o Talosaga lenei e lē o taoto i lagatonu le Faaiuga o le 1994, o se sese matuia e tatau ona faasa’o.
Faaiuga: E tusa ai ma le fuaiupu 89 o le tulafono o Fanua ma Suafa 1981 ua talia talosaga toe Iloilo i le Faaiuga LC 3392 P10 – P26 (31 Ianuari 1994) ma ua toe tuuina atu lenei mataupu i le Faamasinoga Muamua e toe suesue.
