O le afioga Peseta Vaifou Tevaga

O le afioga Peseta Vaifou Tevaga

Ua faaauau le su e sefulu miliona tala a Faatonu o le kamupani nonu o le Local Partners and Associates faasaga i aafiaga tau tupe ma aafiaga o galuega a le kamupani, ona o le talosaga a Peseta Vaifou Tevaga na ave i le faamasinoga ma aumai ai le poloaiga lē tumau na tofia ai se tagata e vaaia le kamupani ae taofia le toe aafia o faatonu i le pulea o galuega masani a lea pisinisi.

O le masina nei na  aumai ai le faaiuga a le tamaitai faamasino le afioga Mata Keli Tuatagaloa i le talosaga a Faatonu o le kamupani ina ia faaauau le latou tagi o le su, peitai na tuu atu ai foi e Peseta Vaifou ma lana loia se talosaga e taofi ai le fofogaina o le su poo se strike out motion.

O le vaega lea o le faamasinoga ua faia ai le faaiuga e faaauau le tagi ae ua talia se vaega o le talosaga a Peseta ua aveesea ai le susuga Laauli Leuatea Polataivao Schmidt ma le kamupani o le Maota Samoa Investment Group mai le tagi a le kamupani faasaga ia Peseta.

O lona uiga mai le toafa oi latou o loo suina lea tamalii o se faipule o le Palemene ae o le minisita lagolago o le Matagaluega a le Palemia ma le Kapeneta, ua aveesea le isi toalua (Laauli Leuata ma le Maota Samoa Investment Group), ae totoe ai na’o le toalua o ē e ana le su o le tofa Apulu Lance Polu, Martin Schwalger ma le kamupani o le Local Partners and Associates.

O le tausaga e 2015 na amata ona oo ai i le faamasinoga maualuga lenei mataupu i le va o Peseta ma faatonu o le kamupani faapea le susuga Laauli o se faipule foi o le Palemene sa avea ma Minisita o le Kapeneta i le paea’iga o loo iai nei a le Palemene. Na ave se isi tagi a Peseta na su ai le kamupani ma faatonu faapea le susuga Laauli.

O se mataupu sa finauina ai e Peseta o ia o se faatonu o le kamupani nonu, peitai o le faaiuga o lea finauga na aumai ai le faaiuga a le faamasinoga maualuga o Peseta e lē o se faatonu. Na apili e lea tamalii le faaiuga ae na aumai le taunuuga e faatumau le faaiuga a le faamasinoga maualuga.

O le tausaga nei ua tolo mai iai se isi mataupu o se tagi a Peseta i moliaga faasolitulafono faasaga i faatonu o le kamupani e aofia ai le susuga Laauli Leuatea. Sa valaau moliaga i le tausaga ua mavae ae o loo iai vaega o tapenaga a le itu a leoleo e lei mautu, le mafuaaga o le toe tolopo. O se tasi o alo tama o le afioga Peseta o loo avea ma se tasi o faatonu o le kamupani nonu.