O le fa masina ma vaiaso o lumanai nei e lē faigofie i tapenaga a le pulega o le autaaalo a Samoa mo taaloga a le Pasefika o le a faia i Apia i le masina o Iulai 2019. E lē faigofie ona o le tapenaina o le autaalo ia lava le mānava ma le malosi aemaise o le iloa ma le silafia e faatino ai taaloga o le a taaalo ai auā ni pine auro se tele faapea ni pine siliva ma le apamemea, ina ia taunuu le miti a le Malo ia tatou siamupini i ia taaloga faavaomalo.
“Talu lava na fai mai i Samoa taaloga nei a le Pasefika e lei oo lava tatou i le sili aoao i le aofaiga o pine, ma o le tāua lena o le feagaiga lea ua sainia ma le ofisa o taaloga a le Pasefika ia mafai ona maua le fesootaiga a le SASNOC ma tatou tagata taaalo e maua ai fautuaga i vaega e tatau ona silafia”. O le saunoaga lea a le Peresetene o le SASNOC le afioga Fepuleai Patrick Fepuleai i le mae’a ona saini le feagaiga poo le MOU (Memorandum of Understanding).
“O loo silasila i se tatou numera o tagata taaalo e silia i le 500 auā o tatou lea e talimalo e tatau la ona faaaogā le avanoa lea e saili ai se tatou ‘au o tagata lelei uma ina ia maua ni tatou pine se tele”. I le pitolaau a le ofisa o taaloga a le Pasefika na faaalia e le alii Pule Sili susuga Falefata Hele Matatia, o loo sologa lelei tapenaga uma o faletaalo ma le fausia o se fale tele o se multipurpose hall mo taaloga.
O loo fausia lea fale i Tuanaimato i se fesoasoani mai le Malo o Saina. O le faletaalo i le Apia Park ua mae’a ona tala i lalo ma o le a toe fausia se faletaalo fou i fesoasoani lava a Saina. Mo le silafia o le faletaalo sa iai sa fausia foi e lea Malo i le taimi sa tapena ai Samoa e talimalo i taaloga a le Pasefika i Saute i le tausaga e 1981.
O le lagolago a pisinisi ma kamupani na faaalia e le Pule Sili o le ofisa o taaloga a le Pasefika o loo solo atu pea fesoasoani ma o le talitonuga o le Pule Sili e ausia lava le aofaiga o le tupe o loo manaomia e faatupe ai taaloga. “O le tulaga lena o loo iai”.
O le vaiaso ua mavae na sainia ai e le ofisa o taaloga a le Pasefika le lagolago atu a se tasi o kamupani inisiua o le Apia Insurance. O le tausaga ua mavae na faamautu ai foi nisi lagolago poo sponsorship mai le faletupe o le Samoa Commercial Bank, Digicel, ma nisi o kamupani i totonu o Samoa.
